Saran Machinery компаниясы Қарағанды облысындағы он колледжбен меморандумға қол қойып, Саран қаласындағы машина жасау өндірісіне қажетті мамандарды даярлауға кірісті. Кәсіпорында Howo және SITRAK брендтерімен самосвалдар мен басқа да ауыр коммерциялық техникалар шығарылады. Білікті жұмысшыларды дуальды оқыту, өндірістік практикадан өту, тағылымдамадан өткізу және нақты өндіріс үдерісімен таныстыру арқылы даярлау жоспарланып отыр.
Компания өндірістік инфрақұрылымды құрумен қатар кадрлық резервті де қалыптастыруда. Бұл мамандардың жұмыс орындарына заманауи технологиялар, жабдықтар және сапа талаптары туралы түсінігі қалыптасқан күйде келуіне мүмкіндік береді.
Saran Machinery компаниясының серіктестері қатарында Қарағанды, Саран және Шахтинск қалаларындағы машина жасау, көлік және өнеркәсіп салаларына мамандар даярлайтын колледждер бар. Келісімдер аясында кәсіпорын өз мамандарын студенттерді оқытуға тартуды, өндірістік практика ұйымдастыруды және колледждермен бірлесіп білім беру бағдарламаларын жетілдіруді жоспарлап отыр.
Өндіріс үшін әртүрлі бағыттағы мамандар қажет. Сондықтан компания студенттерді оқу кезінде-ақ практикалық тұрғыдан даярлауға басымдық беріп отыр.
Келісімдерге қол қоймас бұрын колледж басшылары Saran Machinery өндірістік алаңына барып, жабдықтармен және еңбек жағдайларымен танысты. Сондай-ақ болашақ қызметкерлерге қажетті құзыреттер талқыланды.
Saran Machinery компаниясы болашақ жұмысшыларды даярлаумен қатар, қазіргі қызметкерлердің біліктілігін арттыруға да көңіл бөледі.
Мұндай тәсіл Саран қаласы үшін айрықша өзекті. Соңғы жылдары қаланың индустриялық аймағы ірі өнеркәсіптік жобаларды іске асыру алаңына айналды. Қазір мұнда тоғыз зауыт жұмыс істеп тұр, тағы бес жоба іске асырылу кезеңінде.
Ақпарат көзі : https://www.gov.kz/memleket/entities/karaganda/press/news/details/1295254?lang=ru
Жауап қалдыру Жауапты болдырмау