Сыни тұрғыдан ойлау, медиасауаттылық, азаматтық жауапкершілік және диалог мәдениеті өте маңызды. Адамды өз бетінше ойлауға және сұрақ қоюға үйрету әлдеқайда тиімдірек. «Мен неге осы ақпарат авторына сенуім керек? Олардың айтқандарын тексеруге бола ма?» деген сұрақтар туындауы тиіс. Жастар ақпарат көздерін салыстыруды, деректерді тексеруді және дәлелді пікірталасқа түсуді неғұрлым жақсы меңгерсе, оны манипуляциялау соғұрлым қиынға соғады. Дін, саясат, ұлттық бірегейлік немесе әлеуметтік әділетсіздік туралы сұрақ қоятын жасөспірімнің өзі мәселе емес. Мәселе сол тақырыптарды сабырмен талқылауға дайын жалғыз адам рекрутер (жалдаушы) болып шыққан кезде туындайды. Сондықтан жастарды тыңдап, талқылауға дайын ата-аналар мен мұғалімдер, түсіндірме бере алатын дін өкілдері, жастарды сындарлы іс-әрекеттерге тартатын азаматтық ұйымдар, сондай-ақ диалог жүргізу шеберлігін меңгерген жауапты журналистер мен мемлекеттік органдар қажет.
Егер алдын алу шаралары жастар тарапынан тек тыйым салу және бақылау жүйесі ретінде қабылданса, олардың тиімділігі төмендейді. Дәрістердің орнына пікірталастар, зияткерлік ойындар, шынайы өмірлік жағдаяттарды модельдеу, медиа-тренингтер, дебаттар мен викториналар қажет. XXI ғасырдағы алдын алу жұмыстары нені ойлау керектігін емес, қалай ойлау, тексеру және талдау керектігін үйретуі тиіс.
Халықаралық тәжірибеде «бүкіл қоғамды қамтитын тәсіл» (whole-of-society approach) қолданылады. Экстремизмнің алдын алу тек полицияның немесе арнайы қызметтердің міндеті емес. Құқық бұзушылық орын алмас бұрын-ақ адамды отбасы, мектеп, колледж, университет, достар, азаматтық және діни топтар, сондай-ақ жас көшбасшылар қоршап тұрады. Мемлекет пен қоғам арасындағы ынтымақтастық, ең бастысы – өзара сенім өте маңызды.
Ақпарат көзі : https://www.gov.kz/memleket/entities/kostanai-zhitikarin-toktarov/press/news/details/1295709?lang=ru
Жауап қалдыру Жауапты болдырмау