Қазіргі таңда медициналық-әлеуметтік сараптама саласында азаматтарға көрсетілетін қызметтердің қолжетімділігі мен сапасын арттыру мақсатында проактивті форматтағы куәландыру тетіктері енгізілуде.
Сырттай проактивті куәландыру – азаматтың медициналық ұйымға немесе медициналық-әлеуметтік сараптама бөліміне жеке өзі келу қажеттілігін барынша азайтып, медициналық ақпараттық жүйелердегі мәліметтер негізінде мүгедектікті белгілеу немесе қайта куәландыру мәселесін қарауға мүмкіндік беретін заманауи тәсіл.
Бұл ретте азаматтың денсаулық жағдайы туралы қажетті медициналық мәліметтер денсаулық сақтау жүйесінен электрондық түрде алынады. Мамандар ұсынылған медициналық құжаттар мен объективті медициналық деректерді қолданыстағы нормативтік талаптарға сәйкес зерделейді.
Сырттай проактивті форматтың негізгі мақсаты – азамат үшін рәсімді жеңілдету, уақытты үнемдеу және мемлекеттік қызметті барынша қолжетімді ету. Әсіресе, қозғалысы шектеулі, ауыр жағдайда немесе медициналық ұйымға келуі қиын азаматтар үшін бұл тәсілдің маңызы зор.
Бұл форматта шешім тек медициналық көрсеткіштер мен ұсынылған құжаттардың толықтығы және сапасы негізінде қабылданады. Яғни белгілі бір аурудың болуы өздігінен мүгедектікті белгілеуге негіз болып табылмайды. Мүгедектік организм функцияларының тұрақты бұзылуы және оның адамның күнделікті тыныс-тіршілігіне, еңбек етуіне немесе қоғамға қатысу мүмкіндігіне әсер ету дәрежесі ескеріле отырып айқындалады.
Егер ұсынылған медициналық мәліметтер жеткіліксіз болса немесе азаматтың жағдайын қосымша бағалау қажет болған жағдайда, белгіленген тәртіппен азаматты қосымша тексеруге немесе бетпе-бет куәландыруға жіберу мүмкіндігі қарастырылады.
Осылайша, сырттай проактивті куәландыру – цифрлық технологияларды пайдалана отырып, медициналық-әлеуметтік сараптаманың ашықтығын, қолжетімділігін және азаматқа бағдарлануын арттыруға бағытталған маңызды механизм.
Біздің басты мақсатымыз – әрбір азаматтың заңнамада көзделген құқықтарын сақтай отырып, медициналық-әлеуметтік сараптама қызметін сапалы, объективті және барынша қолайлы түрде ұйымдастыру.
Ақпарат көзі : https://www.gov.kz/memleket/entities/enbek-shymkent/press/news/details/1297930?lang=ru
Жауап қалдыру Жауапты болдырмау