2026 жылғы 1 маусымнан бастап Қазақстан Республикасының жаңа Құрылыс кодексінің қолданысқа енгізілуіне байланысты Комитеттің аумақтық департаменттері құрылыс объектілерінің мүгедектігі бар адамдар мен халықтың жүріп-тұруы шектеулі топтары үшін қолжетімділік талаптарына сәйкестігі туралы декларацияларды келісу жұмыстарын жүргізуде.
Жаңа тетік объектілерді пайдалануға беру кезеңіне дейін қолжетімділік талаптарының сақталуын қамтамасыз етуге бағытталған. Оны енгізу ғимараттар мен құрылыстардың қауіпсіздігі мен қолайлылығын арттыруға, сондай-ақ азаматтардың әлеуметтік және өзге де инфрақұрылым объектілеріне тең қол жеткізуіне мүмкіндік береді.
2026 жылғы 30 қыркүйектегі жағдай бойынша аумақтық департаменттерге 562 өтініш келіп түскен. Оның ішінде 147 өтініш (26%) келісілген, 138 өтініш (25%) бойынша бас тарту туралы шешім қабылданған, 165 өтініш (28%) қаралуда. Тағы 20 өтініш бойынша декларацияны келісу қажеттілігінің жоқтығы анықталған.
Бас тарту туралы шешімдердің ең көп саны Алматы қаласында — 41, Қостанай облысында — 18 және Шымкент қаласында — 14 тіркелген.
Жаңа тетіктің негізгі мақсаты — қолжетімділік талаптарына сәйкес келмейтін объектілердің пайдалануға берілуіне жол бермеу және мүгедектігі бар адамдар мен халықтың жүріп-тұруы шектеулі топтарының инфрақұрылымды кедергісіз пайдалануын қамтамасыз ету.
Жаңа талаптарды қолданудың бірыңғай практикасын қалыптастыру мақсатында Комитет аумақтық департаменттердің қызметкерлеріне оқыту жүргізіп, өңірлер арасында тәжірибе алмасуды ұйымдастыруда. Сонымен қатар объектілердің белгіленген талаптарға сәйкестігін тіркеуге және растауға арналған цифрлық құралдар енгізілуде.
Қолжетімді орта объектіні жобалау кезеңінен бастап қалыптастырылуы, ал қолжетімділік талаптарына сәйкестігі оны пайдалануға бергенге дейін расталуы тиіс. Мұндай тәсіл сәйкессіздіктерді уақтылы анықтауға, құрылыс аяқталғаннан кейін олардың сақталып қалу тәуекелін азайтуға және азаматтардың барлық санатының қажеттіліктеріне сай келетін инфрақұрылым қалыптастыруға мүмкіндік береді.
Комитет декларацияларды келісу тетігін жетілдіру, бақылау іс-шараларының сапасын арттыру және қолжетімділік талаптарының еліміздің барлық өңірінде біркелкі қолданылуын қамтамасыз ету бағытындағы жұмысты жалғастыруда.
Ақпарат көзі : https://www.gov.kz/memleket/entities/lspm/press/news/details/1308372?lang=ru
Жауап қалдыру Жауапты болдырмау