📌 Солтүстік Қазақстан облысындағы ЖРВИ мен тұмау бойынша эпидемиологиялық жағдай

Солтүстік Қазақстан облысында ЖРВИ мен тұмау бойынша эпидемиологиялық жағдай бүгінгі күні тұрақты болып отыр.

2026 жылғы 1 қазаннан бастап 2026–2027 жылдардағы жаңа эпидемиялық маусым басталды.

Эпидемиялық маусым басталғалы бері ЖРВИ-дің 3 356 жағдайы тіркелді. Өткен жылдың сәйкес кезеңімен салыстырғанда сырқаттанушылық 10,2%-ға өскен (3 043 жағдай).

Сонымен қатар ағымдағы эпидемиялық маусымда тұмау жағдайлары әзірге тіркелген жоқ.

Тұмауға қарсы вакцинация

2026 жылғы 6 қазаннан бастап облыста тұмауға қарсы иммундау науқаны басталды. Тәуекел топтарына жататын адамдарды вакцинациялау үшін Ресейде өндірілген «Гриппол Плюс» вакцинасының 60 мың дозасы сатып алынды.

Вакцинация тәуекел топтарына жататын мына адамдарға жүргізіледі:

медицина қызметкерлері;

медициналық ұйымдарда диспансерлік есепте тұрған балалар;

балалар үйлері мен сәби үйлеріндегі балалар;

қарттар үйлерінде тұратын адамдар;

эпидемиологиялық көрсетілімдер бойынша вакцинациялауға жататын адамдар, оның ішінде созылмалы аурулары бар адамдар, мектеп оқушылары, жүкті әйелдер, егде жастағы адамдар, ерте жастағы балалар, сондай-ақ жабық үлгідегі мекемелерде және арнаулы әлеуметтік қызметтер көрсететін ұйымдарда болатын адамдар.

Вакцинация тіркелген жері бойынша емханада тегін жүргізіледі.

Бүгінгі күні тәуекел топтарына жататын 6 675 адамға вакцина салынды.

ЖРВИ мен тұмаудың негізгі белгілері

ЖРВИ мен тұмаудың негізгі белгілеріне дене қызуының көтерілуі, жалпы уыттану белгілері, әлсіздік, дел-салдық, тамақтың ауыруы және мұрынның бітелуі жатады.

Алғашқы белгілер байқалғанда не істеу керек?

ЖРВИ мен тұмаудың алғашқы белгілері пайда болған кезде өзін-өзі емдеуге болмайды. Медициналық көмекке жүгіну немесе дәрігерді үйге шақыру қажет. Инфекцияның таралуына жол бермеу үшін науқас баланы балабақшаға немесе мектепке жібермеу керек.

Аурудың ұзаққа созылуы асқынуларға әкелуі мүмкін. Олардың ішіндегі ең қауіптілерінің бірі – пневмония.

ЖРВИ мен тұмаудан қалай қорғануға болады?

ЖРВИ мен тұмаудың алдын алу үшін:

бөлмелерді күн сайын желдету;

қолды мұқият жуу және қажет болған жағдайда антисептикалық құралдарды пайдалану;

сырқаттанушылықтың маусымдық өсу кезеңінде көпшілік іс-шараларға барудан мүмкіндігінше бас тарту, ал бару қажет болған жағдайда бетперде тағу;

белсенді өмір салтын ұстану және үнемі дене шынықтырумен айналысу;

ұйқы режимін сақтау және дұрыс тамақтану ұсынылады.

Өз денсаулығыңыз бен жақындарыңыздың денсаулығын сақтаңыздар!