Азаматтық қорғау подполковнигі Максим Варзеговтың артында 23 жылдық қызмет жолы, ондаған күрделі өрт оқиғасы және кәсібилік пен командалық үйлесімді жұмыстың арқасында аман қалған адам өмірлері тұр. Ол әкесінің жолын қуып, осы мамандықты таңдады. Ал бүгінде өрт пен түтін ортасында қабылданған әрбір шешімнің қаншалықты маңызды екенін өзі жақсы біледі.
Павлодар облысы Төтенше жағдайлар департаменті Төтенше жағдайларды жою басқармасының бас маманы, азаматтық қорғау подполковнигі Максим Варзегов 2003 жылдан бері азаматтық қорғау органдарында қызмет етіп келеді. Алайда оның мамандық таңдауы кездейсоқ емес еді. Оған үлгі болған — өз әкесі.
Максим мерзімді әскери қызметте жүрген кезде әкесі өртке қарсы қызметке жұмысқа орналасады. Уақыт өте келе ол қарауыл бастығы қызметіне дейін көтеріледі. Үйіне оралған ұлы әкесінің өмірі қаншалықты өзгергенін байқайды: оның өз жұмысына деген мақтанышын, әріптестеріне деген құрметін және өзін арнаған ісіне қаншалықты жауапкершілікпен қарайтынын көреді.
Осылайша, Варзеговтар отбасында өрт сөндірушілер әулетінің негізі қаланды.
«Әкемнің өз ісіне деген шынайы адалдығы мен үшін үлкен бағдар болды. Оған қарап, мен де қоғамға пайдалы адам болып, оның бастаған ісін жалғастырғым келетінін түсіндім», — дейді Максим Варзегов.
Өрт сөндірушінің айтуынша, алғашқы жауынгерлік шақырту әр адамның есінде мәңгі сақталады. Оның алғашқы шақыртуы күндіз болған. Көпқабатты тұрғын үйдің сегізінші қабатында өрт шыққаны туралы хабар түскен.
Оқиға орнына жеткен өрт сөндірушілер терезелерден будақтап шыққан қою түтінді көреді. Өрт ошағы кіреберістегі тамбурдың берік металл есігінің ар жағында болған. Есікті қаққанмен, ешкім жауап бермейді, ал оны тез арада бұзып ашу мүмкін болмайды. Сырттан автосаты орнатуға да мүмкіндік болмады, өйткені оған электр беру желілері кедергі келтірді.
Шешім жағдайдың өзінен табылды: оқиға орнына келген көрші өз пәтеріне кіруге мүмкіндік береді. Өрт сөндірушілер жең құбырын балконға дейін тартып, арнайы ойық арқылы жанып жатқан пәтердің балконына өтіп, барлау жұмыстарын жүргізеді. Пәтер ішінен ес-түссіз жатқан адам табылады. Ол иіс газынан уланған еді.
Зардап шегушіні жедел түрде таза ауаға шығарып, медицина қызметкерлеріне тапсырды. Өрт сөндіріліп, адамның өмірі аман алып қалынды.
Максим Варзеговтың еске алуынша, сол сәтте эмоцияға орын болмаған. Тек бар назарды іске аударып, міндетті орындау қажет еді. Ал болған жағдайдың мәнін ол кейінірек түсінді: өрт сөндіруші мамандығы — тек отпен күресу емес, адамды өмірге қайта оралту мүмкіндігі.
Өрт сөндірушінің жадында мәңгі сақталған тағы бір оқиға бар. Дәліздік жоспармен салынған бес қабатты тұрғын үйдің бірінші қабатында өрт шыққан. Жанып жатқан пәтердің есігі ашық қалғандықтан, түтін тез таралып, жоғарғы қабаттарды басып, тұрғындардың сыртқа шығатын жолын бөгеп тастайды.
Мұндай жағдайда адамдар жиі тұзаққа түскендей күй кешіп, үрейленгеннен терезеден көмек іздейді.
Максим Варзегов әлі күнге дейін үшінші қабаттың терезесінде екі баланы қолына ұстап, көмекке шақырған әкені ұмытпайды. Сол көріністің артында жақындарының өмірі үшін қорқыныш пен жалынды ауыздықтауға келген құтқарушыларға деген үміт тұрды.
Сырт көзге өрт сөндірушілер ештеңеден қорықпайтын адамдар болып көрінуі мүмкін. Алайда Максим Варзегов қорқыныштың адамға тән табиғи сезім екенін айтады. Ең бастысы — оның өз әрекеттеріңді басқаруына жол бермеу.
«Қорқыныш ойланбай жасалатын қателіктерден қорғайды. Тек оны бақылауда ұстауды үйрену керек», — дейді ол.
Бұл жұмыста дене дайындығы, психологиялық төзімділік, тәртіп және жағдайды санаулы секундтар ішінде талдай білу аса маңызды. Жауынгерлік киім мен арнайы жабдықтың салмағы ондаған килограмға жетеді. Ал жұмыс жоғары температура, қою түтін және көріну мүмкіндігі шектеулі жағдайда жүргізіледі.
Дегенмен бұл мамандықтағы ең ауыр нәрсе — адамдардың қайғы-қасіретін көру және әріптестеріңнің өмірі мен денсаулығына жауапты екеніңді сезіну. Ал ең үлкен қанағат сезімі — өз міндетіңді абыроймен орындау: адамдарды құтқару, қауіпті жою және көмек көрсетілген жандардың алғысын есту.
Қызмет күнделікті өмірге деген көзқарасты да өзгертеді. Бір ғана кездейсоқ жағдай немесе бірнеше секундтық салғырттық салдарынан адамдардың мүлкінен, денсаулығынан, кейде тіпті жақындарынан айырылып жатқанын көргенде, қарапайым дүниелердің қадірін басқаша түсіне бастайсың. Үйге аман-есен оралып, жақындарыңды көру және олардың бәрі жақсы екенін білу ерекше мәнге ие болады.
Максим Варзеговтың отбасы да оның мамандығының жауапкершілігі мен қауіптілігін жақсы түсінеді. Ол кезекшілікке түскенде немесе шақыртуға аттанғанда жақындары алаңдап, оның аман-есен оралуын күтеді.
Ал өрт сөндірушінің өзі кезінде әкесіне қарап таңдаған ісін жалғастырып келеді. 23 жылдық қызмет жолында ол бір нәрсеге анық көз жеткізді: бұл салада кездейсоқ адамдарға орын жоқ. Мұнда мықты мінез, кәсіби дайындық, жауапкершілік және қасыңдағы әріптесіңнің сенімді тірегі қажет.
Ақпарат көзі : https://www.gov.kz/memleket/entities/emer-pavlodar/press/news/details/1311800?lang=ru
Жауап қалдыру Жауапты болдырмау