Сарандық полицейлер жанып жатқан көлікті қауіпсіз жерге шығарып, жарылыстың алдын алды

Сарандық полицейлер жанып жатқан көлікті қауіпсіз жерге шығарып, жарылыстың алдын алды
6 мамыр күні кешкі уақытта «Қызылорда – Павлодар» тас жолында, Ақтас ауылының бұрылысында орын алған төтенше жағдайдың соңы қайғылы оқиғаға айналуы мүмкін еді. Алайда Саран қаласының батыл полицейлері өздерінің жедел әрі кәсіби әрекеттерімен адамдардың өмірін аман сақтап қалды. Сағат 23:00 шамасында Саран қалалық патрульдік полиция қызметкерлері – Бағлан Жүнісов пен Әлихан Бақыш – кезекшілік барысында «Газель» маркалы жүк көлігінің өртеніп жатқанын байқайды. Көлік түркиялық азаматқа тиесілі болған. Ол жанармай бекетінің дәл жанында отқа оранған. Апаттан есеңгіреген жүргізуші мен жолаушы көліктен секіріп түсіп, көліктің кез келген сәтте жарылу қаупі алдында не істерін білмей сасқалақтаған. Уақытты босқа жоғалтпаған полиция қызметкерлері өрт қаупін бағалап, батыл шешім қабылдайды – олар жанып жатқан көлікті жанармай бекетінен алыстатып, жарылыс қатерінің алдын алды. Қауіпсіздік мақсатында тәртіп сақшылары көлікті екі жағынан итеріп, жол жиегіне дейін апарып, жағдайды бақылауға алады. Көп ұзамай оқиға орнына жеткен Саран қалалық полиция бөлімінің тергеу-жедел тобы өртті толықтай сөндіруге көмектесті.
– Полиция қызметкерлеріне үлкен рахмет! Олар бізді де, айналамыздағы адамдарды да үлкен апаттан құтқарып қалды, – деп алғысын білдірді көлік жүргізушісі мен жолаушысы.
Сарандық полицейлердің бұл ерлігі – олардың кәсіби даярлығы мен азаматтық жауапкершілігінің жарқын көрінісі. Қарағанды облысының Полиция департаменті аталған қызметкерлердің әрекетін ерекше атап өтіп, алғыс білдіреді.

Ақпарат көзі : https://www.gov.kz/memleket/entities/mvd-karaganda/press/news/details/991512?lang=kk