Ақмола облысы еліміздің ауыл шаруашылығы саласында үздік үштікке кіреді. Өткен жылы өңір рекордтық көлемде өнім жинап, аграршыларға мемлекет тарапынан үлкен қолдау көрсетілді – жеңілдетілген несие, арзандатылған жанар-жағармай, ауыл шаруашылығы техникасын лизингке алу, сондай-ақ сүт-тауарлы фермалар салу қолға алынды. Ауыл шаруашылығы саласындағы жетістіктер мен алдағы жоспарлар жөнінде облыс әкімі Марат Ахметжанов брифинг барысында айтып берді.
2024 жылы өңір диқандары соңғы жылдардағы ең жоғары нәтижеге қол жеткізіп, 6,6 миллион тонна астық жиналды. Қазіргі таңда бұл қарқын бәсеңдеген жоқ: өңірдің жетістіктерін нығайту және рекордтық көрсеткіштерді сақтау бағытында жүйелі жұмыс жүргізілуде.
Марат Ахметжановтың айтуынша, облыс ауыл шаруашылығының барлық негізгі бағыттары бойынша тұрақты өсімді көрсетіп отыр. Бүгінде өңір еліміздегі бидайдың төрттен бір бөлігін – шамамен 5,2 миллион тоннаны өндіреді. Сонымен қатар, құс етінің 30 пайызы (жылына 125 мың тонна) мен жұмыртқаның 16 пайызы (шамамен 690 миллион дана) Ақмола облысының үлесінде. Жыл басынан бері ауыл шаруашылығы өнімінің көлемі 149 миллиард теңгеден 161 миллиард теңгеге дейін артты.
Мал шаруашылығы да қарқынды дамып келеді. Ірі қара мал басы 10 пайызға артып, 450 мың басқа жетті. Қой мен ешкі 15 пайызға көбейіп, 725 мың басты құрады. Жылқы саны 10 пайызға өсіп, 294 мыңнан асты. Құс саны 6 пайызға көбейіп, 10 миллион басқа жуықтады.
Ақпарат көзі : https://www.gov.kz/memleket/entities/aqmola-ush/press/news/details/1045506?lang=kk
Жауап қалдыру Жауапты болдырмау