Жамбыл облысында қазақ халқының бай мәдениеті мен рухани мұрасын дәріптеуге арналған ерекше шара өтті. 2025 жылдың 20 тамызында «Қоғамдық келісім» КММ ұйымдастыруымен «Әулие-Ата» қазақ мәдени орталығы» қоғамдық бірлестігінің «Қазақ халқының мәдени құндылықтары» атты өнер және этнографиялық жеке коллекциялар көрмесі салтанатты түрде ашылды.
Көрменің басты мақсаты – ұлттық құндылықтарды кеңінен насихаттап, өскелең ұрпақтың бойына ата-баба аманатын қадірлеу сезімін сіңіру. Сонымен бірге қоғамда бірлік пен татулықты нығайту да шараның маңызды міндеттерінің бірі болды.
Ашылу салтанатына облыстың этномәдени бірлестік өкілдері, «Мәдениет және өнер» факультетінің студенттері, «Асыл аналар» ансамблі, Жамбыл облыстық тарихи-өлкетану мұражайының ұжымы мен бұқаралық ақпарат құралдарының өкілдері қатысты. Сөз алған «Қоғамдық келісім» КММ басшысы Мүбарак Жинақбаева, орталық төраға орынбасары Айгүл Кабиева және Ақсақалдар кеңесінің төрағасы Асқарбек Сейлхан ұлттық мұраны сақтау – болашақ алдындағы жауапкершілік екенін атап өтті.
Көрменің мәдени бағдарламасы көпшілікке ерекше әсер қалдырды. «Асыл аналар» ансамблінің әуезді әндері мен Қалижан Саркеевтің орындауындағы туындылар жұрт жүрегіне жол тапты. Ал Тараз университеті студенттері қазақы нақыштағы ұлттық киім үлгілерінен сән көрсетілімін ұсынып, дәстүрлі мәдениеттің қазіргі заманғы қырларын паш етті.
Шара соңында белсенді қатысушылар марапатталып, естелік суретке түсті. Бұл көрме Жамбыл облысында қазақ мәдениетінің асыл мұрасын сақтауға және насихаттауға бағытталған маңызды қадам болып, жас ұрпақты ұлттық құндылықтарды қастерлеуге шақырды.
Ақпарат көзі : https://www.gov.kz/memleket/entities/zhambyl-moyynkum/press/news/details/1059017?lang=kk
Жауап қалдыру Жауапты болдырмау