Жетісу облысында полицейлер кәмелетке толмағандардың қауіпсіздігін қамтамасыз ету және жасөспірімдер арасындағы құқықбұзушылықтың алдын алу бағытындағы профилактикалық жұмыстарды күшейтуде.
Полиция департаментінің мәліметінше, жасөспірімдер көбіне кешкі және түнгі уақытта түрлі қауіп-қатерге тап болып, құқықбұзушылыққа араласуы немесе өздері қылмыс құрбанына айналуы мүмкін.
Осыған байланысты өңірде заңды өкілдерінің қарауынсыз түнгі уақытта көшеде жүрген жасөспірімдерді анықтау бойынша тұрақты рейдтік іс-шаралар өткізілуде. Жыл басынан бері осындай 2316 дерек тіркелген.
Әрбір жағдай бойынша жасөспірімдермен және олардың ата-аналарымен профилактикалық түсіндіру жұмыстары жүргізіліп, бала тәрбиесіне қатысты жауапкершілік талаптары түсіндірілуде. Сонымен қатар заңнамаға сәйкес тиісті шаралар қабылданады.
Полицейлердің айтуынша, мұндағы басты мақсат — жазалау емес, балалардың қауіпсіздігін қамтамасыз ету және ықтимал қайғылы жағдайлардың алдын алу.
Құқық қорғау органдары ата-аналардың балаларына тұрақты бақылау жасауы аса маңызды екенін атап өтті. Ересектер баласының кіммен араласатынын, қайда жүретінін және бос уақытын қалай өткізетінін білуі қажет.
Сонымен қатар қазіргі таңда қауіп тек көшеде ғана емес, интернет кеңістігінде де кездеседі. Әлеуметтік желілер мен мессенджерлер арқылы жасөспірімдер заңсыз контентке, интернет-алаяқтыққа, буллингке және өзге де қауіптерге тап болуы мүмкін.
— Кейде бірнеше минуттық ашық әңгіме мәселені дер кезінде байқап, қайғылы жағдайдың алдын алуға көмектеседі, — деп атап өтті Жетісу облысының полиция департаменті.
Тәртіп сақшылары ата-аналарды балаларымен жиі сөйлесуге, олардың эмоционалдық жағдайына және араласатын ортасына назар аударуға шақырады.
Полиция өкілдері ата-аналық бақылау — сенімсіздік емес, баланың қауіпсіздігі мен болашағына деген жауапкершілік екенін еске салды.
Ақпарат көзі : https://www.gov.kz/memleket/entities/qriim/press/news/details/1225572?lang=ru
Жауап қалдыру Жауапты болдырмау