Оңалтудың техникалық құралдарының құнын өтеудің кепілдендірілген сомасын айқындаудың жаңа тәсілдері

Оңалтудың техникалық құралдарының құнын өтеудің кепілдендірілген сомасын айқындаудың жаңа тәсілдері

Қазақстан Республикасы Еңбек және халықты әлеуметтік қорғау министрлігі мүгедектігі бар адамдарды техникалық оңалту құралдарымен (ТОҚ) қамтамасыз ету жүйесін жетілдіру жұмыстарын жалғастыруда. Осы бағыттағы маңызды қадамдардың бірі – Әлеуметтік қызметтер порталы арқылы сатып алынатын ТОҚ құнын өтеудің кепілдендірілген сомасын айқындау тәсілдерін жаңарту болды.

Не өзгерді

Ағымдағы жылдың сәуір айында кепілдендірілген өтеу сомасын есептеу әдістемесі қайта қаралды. Бұрын құн Әлеуметтік қызметтер порталының деректері, мемлекеттік сатып алу және жеткізушілердің коммерциялық ұсыныстары негізінде анықталатын. Енді есептеу Әлеуметтік қызметтер порталы мен электрондық дүкеннің деректеріне сүйене отырып, кейін Қаржы министрлігінің цифрлық жүйелерімен интеграциялау арқылы жүргізіледі.

Мұндай тәсіл ТОҚ құнын нақты нарықтық бағаға жақындатуға және механизмді анағұрлым объективті әрі ашық етуге мүмкіндік береді.

Автоматтандыру және ашықтық

Мемлекеттік ақпараттық жүйелерді дамыту және интеграциялау барысында ұсынылатын кепілдендірілген бағаларды қалыптастыру процесін автоматтандыру жоспарлануда. Ол үшін тауарлардың нарықтық құны туралы сенімді мәліметтер пайдаланылатын болады.

Автоматтандыру мынадай мүмкіндіктер береді:

* құнды айқындауда субъективті факторды болдырмау;
* есептеудің бірыңғай тәсілін енгізу;
* жүйенің ашықтығын арттыру;
* бюджет қаражатын ұтымды пайдалануды қамтамасыз ету.

Әлеуметтік қолдау сақталады

Министрлік өзгерістердің әлеуметтік қолдауды қысқартуға бағытталмағанын атап өтеді. Реформалардың басты мақсаты – негізсіз шығындарды азайтып, мемлекеттік қаражатты тиімді пайдалану арқылы азаматтарды сапалы, заманауи және сұранысқа ие техникалық оңалту құралдарымен қамтамасыз ету.

Күтілетін нәтижелер

Жаңа әдістемені енгізу бірнеше маңызды нәтижеге қол жеткізуге мүмкіндік береді:

* баға қалыптастырудың ашықтығын арттыру;
* ТОҚ құнын әділ айқындау;
* адами факторды болдырмау;
* бюджет қаражатын тиімді пайдалану;
* оңалтудың қолжетімділігі мен сапасын арттыру.

ТОҚ-ны қайтарымды пайдалану бойынша пилоттық механизм

Сонымен қатар техникалық оңалту құралдарын қайтарымды пайдалану бойынша пилоттық механизм енгізілуде. Бұл механизм тек қауіпсіз түрде қайта пайдалануға болатын құралдарға ғана қолданылады. Ал жаялықтар немесе протездер сияқты жеке пайдалануға арналған құралдарға қатысты қолданылмайды.

Қайта пайдаланар алдында әрбір ТОҚ міндетті сараптамадан өтеді. Мамандар тозу деңгейін, жөндеу қажеттілігін және әрі қарай қауіпсіз пайдалану мүмкіндігін бағалайды.

Мұндай механизм азаматтарды қажетті оңалту құралдарымен тезірек қамтамасыз етуге мүмкіндік береді, мысалы, жөндеу кезеңінде немесе жаңа құралдарды жеткізуді күту кезінде.

Қорытынды

Жаңа өзгерістер техникалық оңалту құралдарымен қамтамасыз ету жүйесін заманауи, әділ және ашық етуге бағытталған. Мемлекеттің басты басымдығы – адамның нақты қажеттіліктеріне бағдарлану және көрсетілетін әлеуметтік қолдаудың сапасын арттыру.

Ақпарат көзі : https://www.gov.kz/memleket/entities/enbek-aktobe/press/news/details/1228510?lang=ru