Көрікті табиғат пен келушілер үшін қолжетімділік Шығыс Қазақстан облысындағы Катонқарағай ауданын өңірдегі туризм орталықтарының біріне айналдыруға ықпал етті. Сондықтан туристік сала даму басым бағыттарының қатарына енгізіліп, оған жергілікті әкімдік тарапынан ерекше көңіл бөлінуде.
– Өткен жылдармен салыстырғанда туристер саны бес есеге артты, орналастыру орындарының саны 2,5 есеге көбейді, ал қызмет көрсету сапасы 20 пайызға жақсарды. Жоспарда жалпы құны 37,8 миллиард теңгені құрайтын төрт инвестициялық жобаны іске асыру көзделген. Олардың қатарында Катонқарағай ауылында халықаралық стандарттарға сай қонақүй салу бар. Құны алты миллиард теңге болатын туристік қалашықтың құрылысы жоспарланған. Шұбарағаш ауылындағы «Димаш» сауықтыру кешені толықтай жаңартылып, тау шаңғысы орталығына айналады. Ал Катонқарағай ауылында этно-қонақүй салынады, — деп хабарлады аудан әкімдігінен.
Туризмді дамытуда келесі айда өтетін «Алтай – түркі әлемінің алтын бесігі» мәдени-туристік фестивалінің маңызы зор. Үш күндік мерекелік бағдарлама ұлттық руханият, мәдениет, өнер және спорт бағыттарын қамтиды.
– Фестиваль сахнасында Қазақстан Республикасынан, ТМД елдерінен, Венгрия мен Түркиядан келген әртістер өнер көрсетеді. Фестивальдің басты хедлайнері Димаш Құдайберген болады, – деп қосты аудан әкімдігінен.
Ауданда саяхаттауды ыңғайлы ету үшін жол инфрақұрылымы да белсенді түрде дамытылуда. Язовое көліне апаратын жолдағы көпірді қайта жаңғыртуға 117 миллион теңгеден астам қаржы бөлінді. Катонқарағай және Шыңғыстай ауылдарындағы жолдарды жөндеуге 90 миллион теңге бөлінді. Сондай-ақ «Жаңаүлгі – Жамбыл – Берел», «Согорное – Барлық – Ақсу» бағытындағы жолдарды және Коробиха ауылына апаратын жолды жөндеу жоспарлануда. «Өскемен – Алтай – Үлкен Нарын – Катонқарағай – Рахман қайнарлары» магистралі де жаңартылуда.
Катонқарағай ауданында салынуы жоспарланған әуежайдан Қытай мен Моңғолияға рейстер ашу көзделуде
Әуе айлағының құрылысы – ауданның ең маңызды инфрақұрылымдық жобаларының бірі. Туристер арасында танымал болғандықтан, әуежайдың болуы туризм саласының дамуын едәуір жеделдетуі тиіс.
– Астана, Алматы, Өскемен және Семей қалаларына ішкі әуе рейстерін, сондай-ақ Қытай Халық Республикасы мен Моңғолияға халықаралық әуе рейстерін ашу жоспарлануда. Бұл ауданның халықаралық туристік бағыт ретіндегі мәртебесін нығайтады, — деп түсіндірді аудан әкімдігінен.
Олар сондай-ақ жаңа әуежай тек көлік қолжетімділігін жақсартып қана қоймай, жаңа жұмыс орындарының ашылуына, қонақүй бизнесі мен қызмет көрсету саласының дамуына серпін беретінін қосты.
Интернет қолжетімділігі де туристерді тартуда маңызды рөл атқарады. 2027 жылдың соңына дейін ауданның 1073 тұрғыны бар жеті елді мекеніне интернет біртіндеп қосылады. Ал 2026 жылдың соңына қарай Жаңа Үлгі ауылын интернетке қосу жоспарланған. Халқы аз Акшарбақ және Бекалка ауылдары 2027 жылдың соңына дейін интернетпен қамтылады.
Сонымен қатар әкімдік деректеріне сәйкес, ауданда «Ауыл аманаты» бағдарламасы белсенді жүзеге асырылуда. Биыл осы бағдарлама аясында жалпы сомасы 50 миллион теңгеден астам үш жоба бекітілді. Оның екеуі ара шаруашылығы саласында, біреуі туризм саласында.
Бұдан бөлек, аудан елді мекендерінің санитарлық жағдайын жақсарту үшін Катонқарағай ауылын абаттандыруға, қоқыс контейнерлерін сатып алуға және бес қоқыс полигонын ұйымдастыруға 30 миллион теңге бөлінді.
Дереккөз: ШҚО ӨКҚ
Фото: ШҚО әкімінің баспасөз қызметі
Ақпарат көзі : https://www.gov.kz/memleket/entities/akimvko/press/news/details/1243638?lang=ru
Жауап қалдыру Жауапты болдырмау