Медицина қызметкері күні қарсаңында біз көпшіліктің көзіне көбіне көріне бермейтін, алайда халықтың денсаулығы мен әл-ауқатын сақтауда аса маңызды рөл атқаратын адамдар туралы әңгімелеуді жалғастырамыз.

Біздің тарихымыздың кейіпкері – Ақмола облысы санитариялық-эпидемиологиялық бақылау департаментінің бас маманы Ехсанова Самал Хайрошқызы. Ол санитариялық қызметке 25 жылдан астам өмірін арнаған.

Өзінің кәсіби жолын ол 1999 жылы Зеренді аудандық санитариялық-эпидемиологиялық бақылау басқармасында бастаған. Жұмыстың алғашқы күндерінен бастап-ақ ол тек лауазымдық міндеттерді орындаумен шектелмей, халықтың санитариялық саулығына тікелей әсер ететін үдерістерді терең түсінуге ұмтылды.

Жылдар өте Самал Хайрошқызы мол тәжірибе жинақтап, санитариялық қызметтің негізгі бағыттарының барлығын дерлік қамтыды. Әртүрлі кезеңдерде ол өнеркәсіптік нысандарды, коммуналдық шаруашылықты, қоғамдық тамақтану орындарын және басқа да салаларды бақылаумен айналысты. Әрбір бағыт жоғары жауапкершілікті, кәсіби білім мен салмақты шешім қабылдай білуді талап етті.

2015 жылдан бастап Самал Хайрошқызы Ақмола облысы санитариялық-эпидемиологиялық бақылау департаментінде өз қызметін жалғастыруда. Бүгінде ол ең маңызды әрі жауапты бағыттардың бірі – эпидемиологиялық қадағалауға жетекшілік етеді.

Әріптестері оны білікті, принципшіл және жауапты маман ретінде сипаттайды. Ол әрдайым өз тәжірибесімен бөлісіп, жас мамандарға қолдау көрсетуге дайын. Көп жылғы адал еңбегі жоғары бағаланып, «Халық алғысы» мемлекеттік медалімен марапатталған.

Медицина қызметкері күні қарсаңында Самал Хайрошқызын көпжылдық адал еңбегі мен жоғары кәсібилігі үшін шын жүректен алғыс білдіреміз. Денсаулығы мықты, отбасы аман, бақ-берекесі мол болуын тілейміз.

Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1245666?lang=ru