Қарағанды облысы Полиция департаменті музейіне – 45 жыл: тарих пен тағылымның шежіресі

Қарағанды облысы Полиция департаменті музейіне – 45 жыл: тарих пен тағылымның шежіресі. Қарағанды облысы Полиция департаментінің Еңбек және жауынгерлік даңқ тарихы музейі өзінің құрылғанына 45 жыл толуын атап өтуде. Мерейтой күні музей жетекшісі әрі оның тарихын көздің қарашығындай сақтап келе жатқан Айжамал Айтжанованы Қазақстанның түкпір-түкпірінен, сондай-ақ жақын және алыс шетелдерден әріптестері мен ардагерлер үздіксіз құттықтап, жылы лебіздері мен бейнеқұттықтауларын жолдауда. Кеңестік милициядан бүгінгі заманауи қазақстандық полицияға дейінгі тарихты қамтыған бұл бірегей музейдің шежіресі 1981 жылдан бастау алады. Сол жылы Қарағанды облыстық атқару комитетінің Ішкі істер басқармасы жанынан ведомстволық музей алғаш рет өз есігін айқара ашқан болатын. Бүгінде оның бай экспозициясы бірнеше буын қызметкерлерінің қажырлы еңбегінің нәтижесінде қалыптасты. Музей қорында 3,5 мыңнан астам бірегей жәдігер сақтаулы. Олардың қатарында мұрағат құжаттары, сирек фотосуреттер, өткен жылдардағы қызметтік киім үлгілері мен полиция қызметкерлерінің жеке заттары бар. Музейді ұйымдастырушылардың басты мақсаты – кеңестік милициядан қазіргі қазақстандық полицияға дейінгі құқық қорғау органының даму жолын көрнекі түрде көрсету. Мұндағы әрбір жәдігердің артында адам тағдыры, ерлік пен қызметке адалдықтың тағылымды тарихы жатыр. Мерейтойлық шараға қоғам қайраткерлері, ішкі істер органдарының ардагерлері және қатардағы офицерлер қатысты. Құрметті қонақтардың қатарында: әлемге танымал қоғам қайраткері әрі суретші Кәріпбек Күйіков; қала және облыстағы жетекші музейлердің басшылары; ішкі істер органдарының еңбек сіңірген ардагерлері мен қызметтік міндетін атқару кезінде қаза тапқан полиция қызметкерлерінің туыстары; танымал әнші әрі композитор Марат Бекішев болды. Дәстүр бойынша қонақтар музейге құр қол келген жоқ. Салтанатты шара барысында музей қоры жаңа құнды жәдігерлермен толықтырылып, олар музей жетекшісі Айжамал Айтжановаға табысталды. 

Ақпарат көзі : https://www.gov.kz/memleket/entities/mvd-karaganda/press/news/details/1254516?lang=ru