Ақмола облысында кенелердің белсенділік маусымы басталғалы бері кене шағуына байланысты медициналық көмекке жүгінген тұрғындар саны артқан. Бұл туралы Ақмола облысының Санитариялық-эпидемиологиялық бақылау департаментінің басшысы Серік Омарханов брифинг барысында мәлімдеді.
Оның айтуынша, өңірде кене арқылы таралатын инфекциялардың эпидемиологиялық маусымы жалғасуда. Медициналық ұйымдарда шұғыл профилактика жүргізуге арналған иммуноглобулиннің жеткілікті қоры бар. Сондай-ақ адам денесінен алынған кенені зертханалық тексеруге тегін тапсыруға болады.
Тұрғындарға кене шаққан жағдайда уақыт жоғалтпай медициналық көмекке жүгіну қажеттігі ескертілді. Себебі шұғыл профилактика кене шаққаннан кейінгі алғашқы 72 сағат ішінде ең тиімді нәтиже береді.
Сонымен қатар, Ақмола облысы Конго-Қырым геморрагиялық қызбасы бойынша эндемиялық өңірлер қатарына жатпайтыны, алайда қолайсыз аумақтарға барған кезде сақтық шараларын қатаң сақтау қажет екені айтылды.
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1256595?lang=ru
Жауап қалдыру Жауапты болдырмау