Маңғыстау облысының полиция қызметкерлері хабар-ошарсыз кеткен азаматтарды іздестіру және олардың отбасыларына қайта оралуына көмектесу бағытындағы жұмыстарды тұрақты түрде жүргізуде.
2026 жылдың бірінші жартыжылдығында полиция қызметкерлері хабар-ошарсыз кеткендер ретінде тіркелген 200-ден астам азаматтың жүрген жерін анықтап, үйлеріне қайтарды.
Күн сайын полиция бөлімшелеріне адамдардың жоғалуына байланысты хабарламалар келіп түседі. Әрбір өтініш дереу тіркеуге алынып, ақпарат түскен сәттен бастап іздестіру шаралары басталады.
Хабар-ошарсыз кеткен адамдарды іздеуге криминалдық полиция қызметкерлері, учаскелік инспекторлар, патрульдік нарядтар және жедел қызмет өкілдері жұмылдырылады. Қажет болған жағдайда іздеу жұмыстарына еріктілер тартылып, бейнебақылау камералары, ұшқышсыз ұшу аппараттары және басқа да заманауи техникалық құралдар қолданылады.
Полиция қызметкерлері үшін жоғалған адамдарды іздеу – тек қызметтік міндет емес, сонымен қатар маңызды әлеуметтік жауапкершілік. Әрбір өтініштің артында адам тағдыры, жақындарының алаңдаушылығы және отбасының аман-есен қауышуға деген үміті тұр.
Маңғыстау облысы Полиция департаменті азаматтарға ескертеді: адам жоғалған жағдайда белгілі бір уақыттың өтуін күтпей, дереу полицияға хабарласу қажет. Ол үшін «102» нөміріне қоңырау шалуға немесе жақын маңдағы полиция бөлімшесіне жүгінуге болады.
Уақытылы хабарлау іздестіру шараларының тиімділігін арттырып, жоғалған адамның табылу мүмкіндігін едәуір жоғарылатады.
Маңғыстау облысы Полиция департаментінің баспасөз қызметі
Ақпарат көзі : https://www.gov.kz/memleket/entities/mvd-mangystau/press/news/details/1257303?lang=ru
Жауап қалдыру Жауапты болдырмау