ШҚО-да облыстық мәслихаттың 29 сессиясы өтті

Бүгін Шығыс Қазақстан облысы мәслихатының кезекті 29-шы сессиясы өтті. Оған аймақ басшысы Нұрымбет Сақтағанов, мәслихат төрағасы Денис Рыпаков, депутаттар, басқарма басшылары мен қала, аудан әкімдері қатысты.

Облыс әкімі өз сөзінде жаңа Конституцияның күшіне енуі еліміздің саяси жаңғыруының жаңа кезеңін бастағанын жеткізді.

«Ата Заң халық билігі, әділеттілік, ашықтық және мемлекеттік институттардың есептілігі қағидаттарын орнықтырып, азаматтардың мемлекеттік маңызы бар шешімдерді қабылдауға қатысу мүмкіндігін кеңейтеді. Осыған байланысты алдағы электоралдық науқанның маңызы ерекше. Бұл – конституциялық реформаларды іс жүзінде жүзеге асырудың маңызды кезеңі. Біздің басты міндетіміз – сайлау үдерісінің заңдылығын, ашықтығын, жариялылығын және барлық қатысушылар үшін тең мүмкіндіктерді қамтамасыз ету. Алдағы Құрылтай сайлауында шығысқазақстандықтар дәстүрлі түрде жоғары азаматтық белсенділік танытады деп сенемін», – деді Нұрымбет Сақтағанов.

Аймақ басшысы халықаралық «Алтай – түркі әлемінің алтын бесігі» фестивалінің жоғары деңгейде өткізілгенін, бұл шараның тек Шығыс Қазақстан үшін ғана емес, ең алдымен Мемлекет басшысының тапсырмасымен қайта құрылған Катонқарағай ауданы үшін тарихи маңызы зор оқиға болғанын атап өтті.

«Фестиваль Катонқарағай ауданының халықаралық деңгейдегі танымалдығын арттырып, мыңдаған туристер мен қонақтарды тартты. Сонымен қатар шағын және орта бизнестің, қызмет көрсету, сауда салаларының дамуына тың серпін берді. Бұл бір реттік мәдени шара болып қалмай, Катонқарағайдың орнықты әлеуметтік-экономикалық дамуына, инвестициялар тартуға және жаңа ауқымды жобаларды жүзеге асыруға негіз болатын маңызды бастамаға айналады деген сенімдемін», – деді облыс әкімі.

Сессия барысында ШҚО мәслихат төрағасы Денис Рыпаков жыл басынан бері атқарылған жұмыстар жайлы есеп берді. Оның айтуынша, облыстық мәслихаттың 8 сессиясы, оның ішінде 4 кезекті және 4 кезектен тыс сессия өткізілді. Өңірлік мәслихаттың құзыретіне сәйкес есепті кезеңде барлығы 68 шешім, оның ішінде нормативтік құқықтық сипаттағы 24 шешім қабылданды. Тұрақты комиссиялардың 6 отырысы өткізілді. Күн тәртібіндегі мәселелерді қарау нәтижелері бойынша комиссиялар мемлекеттік органдарға ұсынымдар енгізіп, қаулылар қабылдады. Облыстық мәслихаттың 16 шешімі тұрақты комиссиялардың бақылауына алынды.

Бұдан бөлек, ШҚО білім басқармасының басшысы Қуат Оқасов өңірдегі білім беру қызметтерін мемлекеттік жалпыға міндетті білім беру стандартына сәйкес келтіру бойынша қабылданып жатқан шаралар туралы айтты.

«Облыстағы 380-ге жуық мектепке дейінгі мекемеге 33 100 бала барады. 2 жастан 6 жасқа дейінгі балаларды қамту 99,3% құрайды. Толық қамтуды қамтамасыз ету мақсатында жаңа орындар ашу бойынша өңірлік жоспар іске асырылуда. 2025 жылы 4 жаңа жекеменшік балабақша ашылып, 9 жұмыс істеп тұрған балабақша кеңейтіліп, 1 499 жаңа орын құрылды.

2026 жылы жаңа және жұмыс істеп тұрған мектепке дейінгі мекемелерді ашу және кеңейту есебінен қосымша 1 303 орын ашу көзделген. Сонымен қатар 2027-2028 жылдары мемлекеттік-жекеменшік әріптестік аясында Өскемен қаласында жалпы сыйымдылығы 1 040 орындық 4 балабақша салу мәселесі қарастырылуда», – деді ол.

Ал ШҚО табиғи ресурстар және табиғат пайдалануды реттеу басқармасының басшысы Мұрат Құсайынов ҚР сыбайлас жемқорлыққа қарсы заңнаманы орындау жөнінде есеп берді.

(Материалдарды пайдалану кезінде ШҚО әкімінің баспасөз қызметіне сілтеме жасау міндетті).