Шығармашылық – жанға шипа

Шығармашылық – жанға шипа

TenQogam жобасы мүмкіндігі шектеулі жандардың жаңа дағдыларды меңгеруіне жол ашады

Тараз қаласындағы Жастар мүгедектер қоғамында (ЖМҚ) жүзеге асырылып жатқан TenQogam жобасы ерекше қажеттілігі бар азаматтардың шығармашылық қабілетін дамытып, жаңа дағдыларды меңгеруіне мүмкіндік беріп келеді.

Жоба аясында қатысушылар сурет салу, би, визаж, бисер тоқу, графикалық дизайн, шаштараз өнері және иппотерапиямен айналысады. Бұл сабақтар олардың шығармашылық әлеуетін ашып қана қоймай, қимыл-қозғалысын, ұсақ моторикасын жетілдіріп, өзіне деген сенімін нығайтуға ықпал етеді.

Жобаны Жастар мүгедектер қоғамы «Асар» заңды тұлғалар бірлестігімен бірлесіп, Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасының қолдауымен жүзеге асыруда. 2026 жылдың соңына дейін жоба аясында шамамен 250 адамды қамту жоспарланып отыр.

Жоба жетекшісі Айгерім Дәулетбаеваның айтуынша, басты мақсат – ерекше қажеттілігі бар жандардың өз қабілетін дамытуына жағдай жасап, олардың қоғам өміріне белсенді араласуына қолдау көрсету.

Орталықта 2009 жылдан бері иппотерапия жүргізіледі. Мамандар бұл әдістің дене дамуына ғана емес, қатысушылардың психологиялық жай-күйіне де оң әсер ететінін айтады. Сонымен қатар қатысушылар мәдени және спорттық іс-шараларға қатысып, жаңа достар тауып, өз мүмкіндіктеріне деген сенімін арттыруда.

TenQogam жобасы шығармашылық арқылы ерекше қажеттілігі бар жандардың өмір сапасын жақсартып, олардың қоғамға бейімделуіне және жаңа мүмкіндіктерге жол ашуға бағытталған маңызды әлеуметтік бастама болып табылады.

Ақпарат көзі : https://www.gov.kz/memleket/entities/zhambyl-sayasat/press/news/details/1259368?lang=ru