Шомылу маусымының қызған кезеңінде Маңғыстау облысы полиция департаментінің қызметкерлері азаматтардың судағы қауіпсіздігін қамтамасыз етуге бағытталған профилактикалық жұмыстарды күшейтті. Іс-шаралар «Заң және тәртіп» қағидаты аясында ұйымдастырылып, жазатайым оқиғалардың алдын алуға бағытталған.
Полиция қызметкерлері теңіз жағалауында демалушылармен түсіндіру жұмыстарын жүргізіп, арнайы жабдықталмаған және шомылуға тыйым салынған орындардың қауіпті екенін ескертуде. Сонымен қатар, белгіленген шекарадан асып жүзбеуге және балаларды су жағасында қараусыз қалдырмауға шақыруда.
Биыл профилактикалық жұмыстарға заманауи технология да тартылды. Жағалау аумағын полиция қызметкерлерімен бірге робот-ит патрульдеуде. Кіріктірілген камералар мен дыбыстық хабарлау жүйесі арқылы ол тыйым салынған орындарда шомылып жүрген азаматтарды анықтауға және демалушыларға қауіпсіздік талаптарын сақтау қажеттігі туралы ескерту жасауға мүмкіндік береді.
Судағы қайғылы оқиғалардың басым бөлігі арнайы жабдықталмаған әрі шомылуға тыйым салынған орындарда орын алады. Биыл судағы қауіпсіздік қағидаларын бұзғаны үшін 90 азамат әкімшілік жауапкершілікке тартылды.
Маңғыстау облысының полиция департаменті тұрғындар мен өңір қонақтарын тек ресми рұқсат етілген жағажайларда шомылуға, қалқыма белгілерінен (буйлардан) асып жүзбеуге, алкогольдік ішімдік ішкен күйде суға түспеуге және балаларды үнемі бақылауда ұстауға шақырады.
Судағы қауіпсіздік – әр азаматтың жеке жауапкершілігінен басталады. Қарапайым қауіпсіздік талаптарын сақтау адам өмірін сақтап қалуға мүмкіндік береді.
Ақпарат көзі : https://www.gov.kz/memleket/entities/mvd-mangystau/press/news/details/1260897?lang=ru
Жауап қалдыру Жауапты болдырмау