Медициналық ұйымдарда медициналық көмек көрсетуге байланысты инфекциялардың алдын алу

Медициналық ұйымдарда медициналық көмек көрсетуге байланысты инфекциялардың алдын алу

Медициналық көмек көрсетуге байланысты инфекциялар (МККБИ) қазіргі денсаулық сақтау саласындағы ең өзекті мәселелердің бірі болып табылады. Соңғы жылдары алынған мәліметтер МККБИ-дің науқастардың стационарда болу мерзімін едәуір ұзартып, емдеу шығындарын арттыратынын көрсетеді.

Пациенттер мен жұқтыру қаупі жоғары топқа жататын медицина қызметкерлерінің қауіпсіздігін қамтамасыз ету мақсатында емдеу-профилактикалық ұйымдарда инфекциялық бақылау жүйесі құрылып, жұмыс істейді. Инфекциялық бақылау мен инфекциялық қауіпсіздіктің негізгі міндеті – ауруханаішілік инфекциялардың алдын алу. Қазіргі таңда бұл мәселе кешенді әрі жан-жақты шешілуде. Осыған байланысты әрбір медициналық ұйымда инфекциялық бақылау комитеті жұмыс істейді және инфекциялық бақылау бағдарламасы әзірленген.

Инфекциялық бақылау мамандары МККБИ жағдайлары тіркелген кезде олардың пайда болу себептерін анықтап, оларды жою бойынша қажетті шараларды қабылдайды. Сонымен қатар, ауруханаішілік инфекцияларды белсенді түрде анықтау жұмыстарын жүргізеді: бөлімшелерді аралауға қатысады, зертханалық тексерулердің нәтижелерін, температуралық парақтарды және антибиотиктерді тағайындау деректерін талдайды.

Науқасқа күтім жасау кезінде медицина қызметкерлері санитариялық талаптар сақталмаған жағдайда өздері кез келген жұқпалы ауруды жұқтыруы немесе басқа науқасқа жұқтыруы мүмкін екенін есте сақтауы тиіс. Сондықтан медициналық ұйымдарда санитариялық-эпидемияға қарсы режим қатаң сақталуы қажет.

Пациенттерді инфекциядан қорғау мақсатында барлық емдік және диагностикалық рәсімдерді қауіпсіз орындаудың арнайы ережелері (алгоритмдері) әзірленген. Бұл ережелер МККБИ-дің пайда болу қаупін барынша азайтуға мүмкіндік береді.

Кәсіби аурулардың алдын алу үшін медицина қызметкерлері жеке қорғаныш құралдарын пайдаланады. Оларға халат, бас киім, медициналық маска, бір реттік қолғап, алжапқыш, қорғаныш көзілдірігі және бетке арналған қорғаныш экрандары жатады.

Медицина қызметкерлері инфекциялық бақылау мәселелері бойынша тұрақты түрде оқытудан және аттестаттаудан өтеді. Сондай-ақ, медициналық ұйымның ерекшеліктерін ескере отырып, пациенттер мен қызметкерлердің жұқтыру қаупі бар манипуляцияларды қауіпсіз орындау бойынша білімдері мен тәжірибелік дағдыларын жетілдіру мақсатында рөлдік ойындар өткізіледі.

Санитариялық-эпидемияға қарсы режимді жақсартуға мүмкіндік беретін заманауи жабдықтар тұрақты түрде енгізілуде. Мысалы, операциялық блоктарда ауаны жұқа тазарту сүзгілері арқылы тазарту жүйесі қарастырылған. Палаталар мен емшара кабинеттерінде адамдардың қатысуымен жұмыс істей алатын жабық типті бактерицидтік сәулелендіргіштер орнатылған. Ал стерильді материалдар арнайы бактерицидтік камераларда сақталады.

Бір реттік қолданылатын медициналық бұйымдар кеңінен пайдаланылады. Оларды жаппай қолдану парентералдық вирустық гепатиттердің таралу деңгейін төмендетуге мүмкіндік берді.

Өңірде медициналық қалдықтармен қауіпсіз жұмыс істеу әдісі енгізілген. Медициналық қалдықтарды жинау, тасымалдау және кәдеге жарату орталықтандырылған түрде жүргізіледі. Қалдықтарды жинау үшін олардың қауіптілік класына сәйкес түрлі түсті қаптар мен пакеттер пайдаланылады. Ал өткір және тесетін заттар арнайы тесілмейтін және су өткізбейтін қауіпсіз жинау және кәдеге жарату контейнерлеріне (ҚЖКК) салынады. Медициналық қалдықтарды залалсыздандыру үшін өңірде эпидемиологиялық қауіпті қалдықтарды қауіпсіз күйге дейін өңдеуге мүмкіндік беретін заманауи қондырғылар қолданылады.

Осылайша, инфекциялық бақылау бағдарламасының негізгі бағыттарын сақтау және МККБИ-дің алдын алудың заманауи әдістерін енгізу арқылы медициналық ұйымдардағы инфекциялық асқынулардың жиілігін едәуір төмендетуге болады.

 

 

 

Ақпарат көзі : https://www.gov.kz/memleket/entities/departament-kkbtu-pavlodar/press/news/details/1262463?lang=ru