Бүгін брифинг барысында Ақтөбе облысының білім басқармасы басшысының орынбасары Нұргүл Бертлеуова жаңа оқу жылы қарсаңында балаларға көрсетілетін әлеуметтік қолдау шаралары туралы айтып берді.
Ақтөбе облысында әлеуметтік осал санаттағы балаларға мектепке дайындалу үшін қаржылай және материалдық көмек көрсетіледі. 2026 жылы мұндай қолдауды 16 064 балаға көрсету жоспарланып отыр.
Көмек атаулы әлеуметтік көмек алуға құқығы бар отбасылардан шыққан балаларға, жан басына шаққандағы табысы төмен отбасылардан шыққан балаларға, жетім балаларға және ата-анасының қамқорлығынсыз қалған балаларға, сондай-ақ төтенше жағдайлардан зардап шеккен отбасылардан шыққан балаларға көрсетіледі.
Қазіргі уақытта ата-аналардан қажетті құжаттар қабылдануда. Қаражатты 2026 жылғы 15 тамызға дейін аудару жоспарланып отыр.
Брифинг барысында «Мектепке жол» республикалық қайырымдылық акциясының өткізілуі де атап өтілді. Акция 1 тамыздан 30 қыркүйекке дейін ұйымдастырылады.
Акцияның басты мақсаты – көмекке мұқтаж балаларға материалдық қолдау көрсету және әлеуметтік себептердің олардың мектепке баруына кедергі болуына жол бермеу.
Ақпарат көзі : https://www.gov.kz/memleket/entities/aktobe-bilim/press/news/details/1271078?lang=ru
Жауап қалдыру Жауапты болдырмау