Маңғыстау облысы Полиция департаментінің Көші-қон қызметі басқармасы Қазақстан Республикасының азаматтығына қабылдау және шетел азаматтары мен азаматтығы жоқ адамдарға Қазақстан Республикасында тұрақты тұруға рұқсат беру тәртібіндегі өзгерістер туралы хабарлайды.
Азаматтыққа қабылдау тәртібі
Қазақстан Республикасы Ішкі істер министрлігінің нұсқауына сәйкес, 2026 жылғы 10 сәуірден бастап Қазақстан Республикасының азаматтығына жеңілдетілген тәртіппен қабылдау уақытша тоқтатылды. Қабылдау қайта басталған жағдайда бұл туралы қосымша ақпарат беріледі.
Тұрақты тұруға рұқсат беру тәртібі
2026 жылғы ақпан айынан бастап Қазақстан Республикасында тұрақты тұруға ниет білдірген көшіп келушілер үшін иммиграциялық әлеуетті критерийлерге негізделген бағалау, яғни цифрлық скоринг жүйесі енгізілді.
Бағалау migration.enbek.kz ақпараттық жүйесі арқылы жүргізіледі және бірнеше кезеңнен тұрады: өтініш беру, қазақ тілін білу деңгейін бағалау, сауалнама мен қажетті мәліметтерді енгізу, автоматтандырылған балл есептеу, уәкілетті мемлекеттік органдардың тексеруі және қорытынды әңгімелесу.
Қазақ тілін білу деңгейі ҚАЗТЕСТ жүйесі арқылы бағаланады. Тестілеу 60 сұрақтан тұрады, ұзақтығы – 1 сағат 10 минут, қажетті ең төменгі деңгей – A1. Ведомствоаралық тексеру кезеңінде ішкі істер және ұлттық қауіпсіздік органдары өтініш беруші туралы мәліметтерді тексереді.
Скорингтен сәтті өткен және белгіленген талаптарға сәйкес келетін тұлғалардың тұрақты тұруға рұқсат алу жөніндегі өтініштері белгіленген тәртіппен қабылданады.
Сонымен қатар заңнамада жекелеген санаттағы адамдарға қатысты жеңілдіктер мен ерекшеліктер көзделген. Олардың қатарында Қазақстан Республикасының азаматтарымен отбасын біріктіру мақсатында келетін кейбір тұлғалар, қандастар және заңнамада белгіленген өзге де санаттар бар. Нақты жағдай бойынша талаптар жеке тәртіппен айқындалады.
Маңғыстау облысы ПД Көші-қон қызметі шетел азаматтары мен азаматтығы жоқ адамдарды көші-қон саласындағы заңнама талаптарын сақтауға, қажетті құжаттарды уақтылы рәсімдеуге және тұрақты тұруға рұқсат алу рәсімінен өту кезінде белгіленген тәртіпті сақтауға шақырады.
Қосымша ақпаратты Көші-қон қызметінің аумақтық бөлімшелерінен және мемлекеттік органдардың ресми ақпараттық ресурстарынан алуға болады.
https://www.instagram.com/reel/Db7854Bs1Wd/?utm_source=ig_web_copy_link&igsh=MzRlODBiNWFlZA==
Ақпарат көзі : https://www.gov.kz/memleket/entities/mvd-mangystau/press/news/details/1273007?lang=ru
Жауап қалдыру Жауапты болдырмау