ЖҰМЫС БЕРУШІНІҢ ҚАУІПСІЗ ЕҢБЕК ЖАҒДАЙЛАРЫН ҚАМТАМАСЫЗ ЕТУ ЖӨНІНДЕГІ МІНДЕТТЕРІ

Қауіпсіз еңбек жағдайларын қамтамасыз ету – жай ғана ұсыныс емес, Қазақстан Республикасының Еңбек кодексінде белгіленген жұмыс берушінің міндеті.

Қызметкердің өмірі мен денсаулығын сақтау – еңбек заңнамасының негізгі басымдықтарының бірі. Жұмыс беруші жұмысты зиянды және қауіпті өндірістік факторлардың әсерін барынша болдырмайтындай немесе азайтатындай етіп ұйымдастыруға міндетті.

📌 Жұмыс беруші нақты не істеуге міндетті?

ҚР Еңбек кодексінің 182-бабына сәйкес, жұмыс беруші:

🔹 Кәсіптік тәуекелдерді бағалауға және олардың алдын алу, жабдықтар мен технологиялық процестерді неғұрлым қауіпсіз түрлеріне ауыстыру арқылы тәуекелдерді азайту және болдырмау жөнінде шаралар қабылдауға;

🔹 Қызметкерлерді еңбек қауіпсіздігі және еңбекті қорғау мәселелері бойынша оқытуға, нұсқама беруге және білімдерін тексеруге;

🔹 Өндірістік процестерді қауіпсіз жүргізу және жұмыстарды қауіпсіз орындау жөніндегі қажетті құжаттармен және нұсқаулықтармен қызметкерлерді қамтамасыз етуге;

🔹 Өндірістік жабдықтардың, ғимараттардың, құрылыстардың және жұмыс орындарының белгіленген талаптарға сәйкес қауіпсіздігін қамтамасыз етуге;

🔹 Егер еңбек жағдайларына байланысты қажет болса, қызметкерлерді жеке қорғаныш құралдарымен қамтамасыз етуге;

🔹 Заңнамада, келісімдерде және ұжымдық шарттарда көзделген жағдайларда міндетті медициналық қарап-тексерулерді өткізуге;

🔹 Еңбек қызметіне байланысты жазатайым оқиғаларды заңнамада белгіленген тәртіппен тергеп-тексеруге;

🔹 Еңбек қауіпсіздігі мен еңбекті қорғаудың ішкі бақылауын жүзеге асыруға және еңбекті қорғауды басқару жүйесінің жұмыс істеуін қамтамасыз етуге;

🔹 Қызметкерлердің өмірі мен денсаулығына қауіп төндіруі мүмкін қауіпті жағдай туындаған кезде қажетті шараларды қабылдауға міндетті.

💰 Қаржыландыру: 100% жұмыс берушінің есебінен.

ҚР Еңбек кодексінің 180-бабына сәйкес, еңбек қауіпсіздігі және еңбекті қорғау жөніндегі іс-шараларды қаржыландыру жұмыс берушінің қаражаты және заңнамада тыйым салынбаған басқа да көздер есебінен жүзеге асырылады.

❗ Қызметкер еңбек қауіпсіздігі мен еңбекті қорғауды қамтамасыз етуге байланысты шығындарды көтермеуге тиіс.

Бұл ретте жұмыс берушінің еңбек қауіпсіздігі үшін жауапкершілігі қызметкердің өз міндеттерін орындауын жоққа шығармайды.

Қызметкер, өз кезегінде, еңбек қауіпсіздігі және еңбекті қорғау талаптарын сақтауға, берілген жеке қорғаныш құралдарын дұрыс пайдалануға, қажетті оқудан және медициналық қарап-тексерулерден өтуге, сондай-ақ өмір мен денсаулыққа қауіп төндіретін қауіпті жағдайлар, өндірістік жарақаттар және басқа да мән-жайлар туралы жұмыс берушіге дереу хабарлауға тиіс.

⚠️ Маңызды: жұмыс беруші тек нұсқама өткізумен формалды түрде шектеле алмайды. Қауіпсіз еңбек жағдайларын жасау — тәуекелдерді бағалауды, қызметкерлерді оқытуды, жарамды жабдықтарды пайдалануды, қорғаныш құралдарымен қамтамасыз етуді, медициналық қарап-тексерулерді, бақылауды және еңбек жағдайларын тұрақты түрде жетілдіруді қамтитын кешенді жүйе.

📖 ҚР Еңбек кодексінің негізгі нормалары:

• 22, 23-баптар– қызметкердің еңбек қауіпсіздігі және еңбекті қорғау саласындағы негізгі құқықтары мен міндеттері;
• 180-бап— еңбек қауіпсіздігі және еңбекті қорғау жөніндегі талаптар және іс-шараларды қаржыландыру;
• 181-бап— қызметкердің еңбек қауіпсіздігі және еңбекті қорғау саласындағы құқықтары мен міндеттері;
• 182-бап— жұмыс берушінің еңбек қауіпсіздігі және еңбекті қорғау саласындағы құқықтары мен міндеттері;
• 182-1-бап— қабылдаушы тараптың еңбек қауіпсіздігі және еңбекті қорғау саласындағы құқықтары мен міндеттері.

Есте сақтаңыз: қауіпсіз еңбек жағдайлары — ең алдымен адамның өмірі мен денсаулығын сақтау!

 

Ақпарат көзі : https://www.gov.kz/memleket/entities/vko-enbek/press/news/details/1273420?lang=ru