Мақтаарал ауданы, 23 тамыз 2026 жыл. Бүгін Мақтаарал ауданында Қазақстан Республикасы Құрылтайы депутаттарының сайлауы басталды. Аудандағы барлық 62 дауыс беру учаскесі белгіленген уақыт бойынша өз жұмысын бастап, сайлаушыларды қабылдауға кірісті.
Дауыс беру учаскелерінің ашылу рәсімі дәстүрге сай Қазақстан Республикасының Мемлекеттік Гимнін орындаудан басталды. Жергілікті уақыт бойынша сағат 07:00-де учаскелер ресми түрде ашылып, сайлаушылардың өз конституциялық құқықтарын жүзеге асыруына мүмкіндік берілді.
Учаскелік сайлау комиссияларының мүшелері сайлау процесін ұйымдастыруға толық дайындықпен кірісті. Дауыс беру учаскелерінде қажетті жағдайлар жасалып, сайлаушыларды қабылдау, олардың жеке басын сәйкестендіру, бюллетень беру және дауыс беру тәртібіне қатысты жұмыстар белгіленген заң талаптарына сәйкес жүргізілуде.
Сайлау күні азаматтардың өз таңдауын еркін, ашық және заң талаптарына сай жүзеге асыруына барлық қажетті жағдай қарастырылған. Учаскелік сайлау комиссиялары сайлаушыларға тиісті түсіндіру жұмыстарын жүргізіп, дауыс беру процесінің белгіленген тәртіппен өтуін қамтамасыз етуде.
Дауыс беру процесі сағат 20:00-ге дейін жалғасады. Осы уақыт аралығында Мақтаарал ауданының сайлаушылары өздері тіркелген дауыс беру учаскесіне барып, Қазақстан Республикасы Құрылтайы депутаттарын сайлауға қатыса алады.
Сайлау күні азаматтардың қоғамдық-саяси белсенділігін арттыруға және сайлауға қатысу мәдениетін қалыптастыруға бағытталған бірқатар шаралар да ұйымдастырылуда. Атап айтқанда, дауыс беру учаскелеріне алғашқылардың бірі болып келіп, өз таңдауын жасаған азаматтарға арнайы естелік сыйлықтар табысталды.
Бұл бастама сайлаушылардың азаматтық белсенділігін қолдап, елдің қоғамдық өміріне жауапкершілікпен қатысып отырған тұрғындарға алғыс білдіру мақсатында жүзеге асырылды.
(с) Мақтаарал ауданы әкімінің баспасөз қызметі
Ақпарат көзі : https://www.gov.kz/memleket/entities/turkestan-maktaaral/press/news/details/1278456?lang=kk
Жауап қалдыру Жауапты болдырмау