Атырау облысында агроөнеркәсіптік кешенді техникалық жаңғырту және ауыл шаруашылығы тауарын өндірушілердің заманауи техникаға қолжетімділігін арттыру бағытындағы жұмыстар жүйелі жүргізілуде.
Мемлекеттік қолдау тетіктерінің бірі – ауыл шаруашылығы техникасын жеңілдікті лизинг арқылы алу. Бұл шаруашылықтардың машина-трактор паркін жаңартып, өндіріс тиімділігін арттыруға мүмкіндік береді.
Өңірде ауыл шаруашылығы техникасын жаңарту қарқыны жыл сайын артып келеді. 2024 жылы техника паркін жаңарту деңгейі 37,76 пайызды құраса, биылғы жылмен салыстырғанда бұл көрсеткіш 62,92 пайызға дейін өскен.
2026 жылғы тамыздағы жағдай бойынша ауыл шаруашылығы техникасын сатып алуға қатысты 81 өтінім қабылданып, 152 қаржылық лизинг шарты жасалды. Нәтижесінде аграрлық құрылымдар тракторлар, жемшөп дайындайтын техникалар мен аспалы жабдықтарды қоса алғанда, қажетті заманауи техникалармен қамтамасыз етіледі.
Инвестициялық субсидиялау және жеңілдікті лизинг бағдарламалары аясында ауыл шаруашылығы тауарын өндірушілер заманауи әрі жоғары өнімді техникаларды сатып алуға мүмкіндік алуда.
Ауыл шаруашылығы техникасын жаңарту егіс және басқа да маусымдық жұмыстарды уақытылы жүргізуге, еңбек өнімділігін арттыруға, өндірістік шығындарды азайтуға және шаруашылықтардың тиімділігін көтеруге ықпал етеді.
Осылайша, жеңілдікті қаржыландыру бағдарламаларын тиімді пайдалану Атырау облысының агроөнеркәсіптік кешенінің материалдық-техникалық базасын нығайтып, ауыл шаруашылығы өндірісінің бәсекеге қабілеттілігін арттыруға мүмкіндік береді.
Ақпарат көзі : https://www.gov.kz/memleket/entities/atyrau-auyl/press/news/details/1280144?lang=ru
Жауап қалдыру Жауапты болдырмау