Жалған жұмысқа орналастыру мәселесі әр жағдайдың нақты мән-жайларын жан-жақты бағалауды талап етеді. Еңбек шартының болуы немесе Еңбек шарттарын есепке алудың бірыңғай жүйесінде (ЕСУТД) тіркелуі еңбек қатынастарының іс жүзінде жүзеге асырылғанын өздігінен білдірмейді.
Нақты еңбек қатынастарының негізгі белгілеріне жұмыскердің өз міндеттерін орындауы, тапсырмалар алуы, еңбек тәртібін сақтауы және атқарған еңбегі үшін жалақы алуы жатады.
Тексеру барысында мемлекеттік еңбек инспекторы еңбек шарттарын, жұмысқа қабылдау туралы бұйрықтарды, табельдерді, жалақының есептелуін, лауазымдық міндеттерді, тараптардың түсініктемелерін және жұмыстың нақты орындалғанын растайтын өзге де құжаттарды зерделейді.
Айта кету қажет, Қазақстан Республикасының Еңбек кодексінде «жалған жұмысқа орналастыру» деген жеке ұғым немесе дәл осы атаумен айыппұл көзделмеген. Жауапкершілік анықталған нақты құқық бұзушылыққа байланысты белгіленеді. Алаяқтық, құжаттарды қолдан жасау немесе қаражатты жымқыру белгілері болған жағдайда материалдар құқық қорғау органдарына берілуі мүмкін.
Егер азамат өзінің келісімінсіз жұмысқа рәсімделгенін анықтаса, алдымен жұмыс берушіден түсініктеме талап етіп, сондай-ақ «Е-Өтініш» арқылы аумақтық еңбек инспекциясына жүгінуге болады. ЭЦҚ-ны заңсыз пайдалану немесе қолды қолдан жасау жағдайында құқық қорғау органдарына хабарласу қажет.
Ақпарат көзі : https://www.gov.kz/memleket/entities/kostanai-enbek/press/news/details/1280303?lang=ru
Жауап қалдыру Жауапты болдырмау