Жаңаөзен қаласында «Халық» қайырымдылық қорының демеушілігімен дене шынықтыру-сауықтыру кешені салынуда. Жаңа нысан қала тұрғындарының спортпен тұрақты айналысуына және бұқаралық спортты дамытуға мүмкіндік береді.
Маңғыстау облысының әкімі Нұрдәулет Қилыбай Жаңаөзен қаласына жұмыс сапары барысында аталған нысанға барып, құрылыс барысымен танысты.
Дене шынықтыру-сауықтыру кешені Жаңаөзен қаласындағы №3 Өндірістік аймақта орналасқан. Құрылыс жұмыстары 2025 жылы басталған, нысанды 2026 жылы аяқтау жоспарланған.
Кешеннің салынуы Жаңаөзен тұрғындары үшін спорттық инфрақұрылымның қолжетімділігін арттыруға бағытталған. Нысан пайдалануға берілгеннен кейін қалада дене шынықтырумен және спортпен айналысуға арналған қосымша мүмкіндік қалыптасады.
– Мемлекет басшысы бұқаралық спортты дамытуға, халықтың денсаулығын нығайтуға және спорттық инфрақұрылымды қолжетімді етуге ерекше мән беріп келеді. Бұл бағытта мемлекеттік жобалармен қатар, әлеуметтік жауапкершілікті сезініп, өңірлерді қолдап отырған кәсіпкерлер мен қайырымдылық қорларының үлесі де маңызды. Жаңаөзендегі бұл кешен қала тұрғындарына қызмет етіп, балалар мен жастардың спортқа қызығушылығын арттыруға ықпал етеді. Сондықтан құрылыс жұмыстарын сапалы жүргізіп, нысанды белгіленген мерзімде аяқтау қажет, – деді Нұрдәулет Қилыбай.
Облыс әкімі құрылыс жұмыстарының сапасына назар аударып, нысанды белгіленген мерзімде аяқтау және пайдалануға беруге дайындық жұмыстарын қамтамасыз ету қажет екенін атап өтті.
Дене шынықтыру-сауықтыру кешенінің құрылысы – Жаңаөзендегі спорттық инфрақұрылымды дамытуға бағытталған әлеуметтік маңызы бар жобалардың бірі. Нысанның іске қосылуы қала тұрғындарына спортпен шұғылдануға жаңа мүмкіндік беріп, бұқаралық спортты одан әрі дамытуға жол ашады.
Маңғыстау облысы әкімінің баспасөз қызметі
Ақпарат көзі : https://www.gov.kz/memleket/entities/mangystau/press/news/details/1282371?lang=ru
Жауап қалдыру Жауапты болдырмау