Бескөл ауылында Солтүстік Қазақстан облысы полиция департаментінің қызметкерлері арасында «Заң мен Тәртіп» атты облыстық көркемөнерпаздар байқауы өтті.
Іс-шараның патриоттық мазмұны оның символдық басталуынан-ақ көрінді. Байқауға қатысушылар Халық Қаһарманы Ғазиз Байтасованың портретіне гүл шоқтарын қойып, Қазақстан полициясының қаһарманын бір минут үнсіздікпен еске алды.
Байқауға полицияның түрлі бөлімшелерінен 50-ден астам қызметкер қатысты. Қатысушыларға СҚО полиция департаменті бастығының орынбасары, полиция полковнигі Абылғазы Ғабдуллин сәттілік тіледі. Ол сахнаға шығу қызметтік міндеттерді орындағандағыдай жинақылықты талап ететінін, ал талантты дамыту қызметкердің шығармашылық қана емес, кәсіби тұрғыдан да өсуіне ықпал ететінін атап өтті.
Сахнада патриоттық бағыттағы «Туған жер», «Атамекен», «Елім менің» әндерінен бастап, көпшілікке танымал «Синяя вечность», «День Победы», «Офицеры» шығармаларына дейін түрлі әндер орындалды. Қатысушылар домбыра мен гитараның сүйемелдеуімен де өнер көрсетті.
Байқаудың бас жүлдесін СҚО полиция департаменті арнайы жедел әрекет ету жасағының аға инспекторы Абылайхан Өмірзақ «Жарығым-ай» әнін шебер орындағаны үшін иеленді. Екінші орын СҚО ПД арнайы және кәсіби даярлық басқармасының қызметкері Асхат Армиеновке «Елім менің» әнін орындағаны үшін берілді. Үшінші орынды Мағжан Жұмабаев ауданы полиция бөлімінің қызметкері Айбек Сәрсенбаев «Мама» әнін әсерлі орындағаны үшін алды.
«Өнерің өрге бассын» номинациясында авторлық «Выше руки» әнін орындаған Александр Шейко мен Ернұр Құрман үздік деп танылды. «Көрермен көзайымы» номинациясын Қызылжар ауданы полиция бөлімі бастығының бірінші орынбасары Аслан Бекмағамбетов жеңіп алды. «Жаңа есім» номинациясында полиция аға лейтенанты Айдар Әбілмажинов ерекшеленді.
Полиция қызметі тәртіпті, сабырлылықты және кез келген жағдайда әрекет етуге дайын болуды талап етеді. Алайда форма артында өзінің қызығушылығы, таланты мен музыкаға деген сүйіспеншілігі бар адам тұр. Осындай кездесулер қызметкерлердің бойындағы жаңа қырларды ашып, сахнада да, күнделікті қызметте де маңызды командалық рухты нығайтуға мүмкіндік береді.
Ақпарат көзі : https://www.gov.kz/memleket/entities/mvd-sko/press/news/details/1283223?lang=ru
Жауап қалдыру Жауапты болдырмау