Бүгін Қарауылда жаңғыртылған саябақ пайдалануға берілді. Салтанатты шараға облыс әкімі Берік Уәли қатысты.
Саябақ «Таза Қазақстан» республикалық экологиялық акциясы аясында облыстық бюджет қаражаты есебінен толық жаңғыртылды. Жаңғырту жұмыстарының негізгі мақсаты – ауыл тұрғындары үшін қолайлы қоғамдық орта қалыптастыру, демалыс пен спортпен айналысуға қажетті жағдай жасау және саябақтың сәулеттік келбетін жақсарту.
Салтанатты шарада сөз алған аймақ басшысы жаңғыртылған саябақ ауыл тұрғындары үшін маңызды қоғамдық кеңістікке айналатынын атап өтті.
«Бүгін, тұтас ел көлемінде қызу қолдауға ие болған «Таза Қазақстан» экологиялық акциясының шеңберінде Абай ауданында ерекше маңызы бар демалыс орны қайта жаңғыртылып, пайдалануға беріліп отыр. Мемлекет басшысы Қасым-Жомарт Кемелұлы Тоқаев Ұлттық құрылтайдың бесінші отырысында сөйлеген сөзінде: «Таза Қазақстан – әдемі ұран да, науқан да емес, бұл – күнделікті қажырлы еңбектің нәтижесі. Тазалық тәртіпті күшейтеді, ал тәртіп жауапкершілікті арттырады» деп атап өткен болатын. Мемлекет басшысының тікелей бастамасымен жүзеге асқан бұл акцияның арқасында Отанымыздың әр облысы, қаласы мен ауылында көшелер абаттандырылып, саябақтар жаңғыртылып, ағаш-көшеттер отырғызылып, өңірдің өңі мен көркі кіріп келеді. Сол игі бастама бүгін Ұлылар елінде жалғасын тауып отыр. Халықтың сұранысын ескеріп, облыстық бюджеттен 80 миллион теңгеге жуық қаражат бөлдік. Нәтижесінде бүлдіршіндерден бастап, ауыл үлкендеріне дейін демалатын, салауатты өмір салтын ұстанып, болашақ чемпиондар дайындалатын ерекше қоғамдық кеңістік пайда болды. Абай елі – руханияттың алтын бесігі. Ұлы Абайдың туған жерінде әр нысанның көркі мен келбеті осы өлкенің мәртебесіне сай болуы тиіс. Сондықтан елді мекендерді көркейту, тұрғындарға қолайлы орта қалыптастыру – облыс әкімдігінің маңызды, басты бағыттарының бірі. Бұл бағыттағы жұмысты жалғастыра береміз», – деді Берік Уәли.
Жоба аясында тұрғындар мен жастардың спортпен тұрақты айналысуына мүмкіндік беретін футбол, волейбол және Street Workaut алаңдары, шахмат, теннис және тоғызқұмалақ үстелдері орнатылды. Саябақтың сыртқы жарықтандыру жүйесі толық жаңартылды. Аумақтың кешкі уақытта қауіпсіз әрі жарық болуын қамтамасыз ету мақсатында 79 жарықтандыру бағаны, 24 сәндік жарықтандыру тірегі және 55 LED шамдары қойылды.
Сонымен қатар, саябақтың сыртқы келбетін жақсарту және аумақты ретке келтіру үшін жалпы ұзындығы 900 метр болатын қоршау жөнделді. Саябақ ішіндегі жаяу жүргіншілер жолдары мен алаңдарға 1200 шаршы метрге жуық тақтатас төселді. Мұның барлығы – балалардың бос уақытын тиімді өткізуіне және тұрғындардың қауіпсіз демалуына бағытталған игі шаралар.
Ақпарат көзі : https://www.gov.kz/memleket/entities/abay/press/news/details/1285978?lang=ru
Жауап қалдыру Жауапты болдырмау