Бүгін Сәрсен Аманжолов атындағы Шығыс Қазақстан университетінің ұжымына жаңа ректор – Гүлжан Жарасова ресми түрде таныстырылды. Шығыс Қазақстан облысының әкімі Нұрымбет Сақтағанов Гүлжан Жарасованы С. Аманжолов атындағы ШҚУ ректоры қызметіне тағайындалуымен құттықтады.
Университет ұжымының алдында сөз сөйлеген облыс әкімі Нұрымбет Сақтағанов жоғары оқу орындарының кадр даярлаудағы және адами капиталды қалыптастырудағы айрықша рөліне тоқталды. Сондай-ақ Мемлекет басшысы Қасым-Жомарт Тоқаевтың жоғары оқу орындарының стратегиялық маңызы туралы айтқан сөздерін еске салды. Президенттің айтуынша, «университет тек кадр даярлайтын орталық қана емес, елдің әлеуметтік-экономикалық дамуына үлес қосатын стратегиялық орталық болуы керек».
«Сәрсен Аманжолов атындағы Шығыс Қазақстан университетінің тарихы терең және өңірдің білім беру жүйесінде өзіндік маңызды орны бар. Университет Шығыс Қазақстан мен еліміздің өзге де өңірлері үшін кәсіби мамандар даярлап, ғылым мен білім беру бағыттарын дамытып келеді. Гүлжан Жарасованың кәсіби және басқару тәжірибесі университеттің одан әрі дамуына серпін беріп, оның ғылыми және білім беру әлеуетін нығайтуға мүмкіндік беретініне сенімдімін», – деді Нұрымбет Сақтағанов.
Облыс әкімі жаңа ректорға қызметіне табыс, мықты команда және алға қойған барлық жоспарларды жүзеге асыруын тіледі.
Гүлжан Сағидоллақызы Жарасованың жоғары білім, ғылым және мемлекеттік басқару салаларында көп жылдық еңбек тәжірибесі бар. 2025 жылдан 2026 жылғы тамызға дейін Қазақстан Республикасы Ғылым және жоғары білім министрлігінің Жоғары және жоғары оқу орнынан кейінгі білім комитетін басқарды.
(Мәтін мен фотосуреттерді пайдаланғанда ШҚО әкімінің баспасөз қызметіне сілтеме жасау міндетті).
Ақпарат көзі : https://www.gov.kz/memleket/entities/akimvko/press/news/details/1286302?lang=ru
Жауап қалдыру Жауапты болдырмау