Қарағандыда Соқыр өзенінің арнасында ауқымды жұмыстар басталды. Өзен арнасы кеңейтіліп, тереңдетіліп, қоқыс пен қалың өскен өсімдіктерден тазартылуда. Жұмыстар ұзындығы 23 шақырым болатын учаскені қамтиды. Ол мұсылман зираты орналасқан аумақтан әуежайға апаратын жолдың бойымен Федоров саяжайлары бағытына дейінгі аралықты алып жатыр.
Мамандар қазірдің өзінде қалың өскен тал-тоғай мен қамысты, сондай-ақ қоқысты тазалап, жекелеген учаскелерді аршып, өзен арнасын тереңдетіп әрі кеңейтіп жатыр. Негізгі мақсат – арнаның су өткізу қабілетін қалпына келтіру. Бұл су тасқыны кезінде судың кедергісіз өтуіне мүмкіндік беріп, өзенге іргелес аумақтарды су басу қаупін азайтады. Жұмыстар екі жылға есептелген.
Бұл мәселе әсіресе саяжай иелері үшін өзекті. Су тасқыны кезеңінде олардың саяжай учаскелерін су басу қаупі туындаған.
Сонымен қатар өзенге жақын маңда №10 коллектор орналасқан. Осыған байланысты кей жағдайларда кәріз сулары мен өзен суының араласуы орын алған. Қазір коллектор үшін айналма желі салынды. Ол инженерлік коммуникацияларды саяжай алқаптарының аумағынан шығаруға және кәріз жүйесінің сенімділігін арттыруға мүмкіндік береді.
Ақпарат көзі : https://www.gov.kz/memleket/entities/karaganda/press/news/details/1287015?lang=ru
Жауап қалдыру Жауапты болдырмау