Қарағанды облысында бір күннің ішінде есірткі заттарын жарнамалайтын мыңнан астам граффити жойылды. Бір мезгілде Қарағанды, Теміртау және Балқаш қалаларында өткен рейдке полиция қызметкерлері, еріктілер мен қоғамдық белсенділерді қоса алғанда, 200-ден астам адам қатысты.
Рейд барысында оның қатысушылары ғимараттардың қабырғаларына, инфрақұрылым нысандарына және басқа да қоғамдық орындарға жазылған интернет-дүкендердің мекенжайлары мен тыйым салынған заттардың өзге де жарнамаларын бояп, өшірді.
Қарағанды облысының Полиция департаментінің мәліметінше, есірткі жарнамасы бар жазуларды анықтау және жою жұмыстары тұрақты түрде жүргізіледі. Жыл басынан бері өңірде 92 рейд ұйымдастырылып, нәтижесінде 7 мыңнан астам осындай жазу жойылды.
Бұл ретте құқық қорғау органдары заңсыз жарнаманы өшірумен ғана шектелмейді. Полиция оны қабырғалар мен басқа да нысандарға түсіретін адамдарды анықтау жұмыстарын да жүргізіп жатыр. Жыл басынан бері үш адам есірткі жарнамасы бар граффити салып жатқан жерінде ұсталды.
— Бүгінгі басты міндетіміз — кезекті жазуды бояп қана қою емес, есірткі жарнамасының таралуына жол бермеу және оның артында тұрған адамдарды анықтау. Бұл іске жастардың белсенді түрде атсалысып жатқаны аса маңызды. Бірлескен күш-жігердің арқасында мұндай фактілерді жедел анықтап, олардың жолын бастапқы кезеңінде-ақ кесуге болады, — деді Қарағанды облысы ПД Есірткі қылмыстарына қарсы іс-қимыл басқармасының бастығы Қайыржан Төкібаев.
Мұндай жазуларды салғаны үшін қылмыстық жауапкершілік қарастырылған. Өңірде осыған байланысты сот үкімдері де шығарылды.
Мәселен, мамыр айында Балқашта өткен рейд кезінде полиция қызметкерлері есірткі жарнамасы бар граффити салып жатқан 37 жастағы жергілікті тұрғынды ұстады. Ер адамға қатысты қылмыстық іс қозғалды. Сот оны кінәлі деп танып, 1 жыл 6 айға бас бостандығынан айыру жазасын тағайындады.
Полиция есірткі жарнамасы бар граффитидің жай ғана мүлікті бүлдіру фактісі емес екенін атап өтті. Мұндай жазулар тыйым салынған заттарды жарнамалау, сондай-ақ адамдарды есірткінің заңсыз айналымына тарту үшін пайдаланылуы мүмкін.
Құқық қорғау органдары өңір тұрғындарын мұндай фактілерге бейжай қарамауға шақырады. Есірткі жарнамасы бар граффити анықталған жағдайда полицияға хабарлау қажет. Уақтылы берілген ақпарат заңсыз жарнаманы таратушыларды анықтап, олардың әрекетінің жолын кесуге ықпал етеді.
Ақпарат көзі : https://www.gov.kz/memleket/entities/karaganda/press/news/details/1296222?lang=ru
Жауап қалдыру Жауапты болдырмау