Бүгін Бауыржан Момышұлы ауылындағы Орталық саябақтың сенімгерлік басқарушысы – ЖК Tompaq өкілдерімен жұмыс кездесуі өтті.
Кездесуге аудан әкімінің орынбасары Қайрат Есенбекұлы Жатқанбаев, ауыл әкімі Ратбек Қанатбекұлы Көсембаев, құрылыс бөлімінің өкілі Тимур Қалдыбаев және тұрғын үй-коммуналдық шаруашылық бөлімінің өкілі Фархат Мәлікбай қатысып, саябақтың қазіргі жай-күйіне комиссиялық зерделеу жұмыстарын жүргізді.
Айта кетейік, Орталық саябақ 2025 жылдан бастап 5 жыл мерзімге ЖК Tompaq компаниясының сенімгерлік басқаруына берілген. Сенімгерлік басқарушының міндетіне балалар ойын алаңдарының қауіпсіз әрі жарамды күйде болуын қамтамасыз ету, бүлінген нысандарды уақытылы жөндеу, жасыл желекті күтіп-баптау және суару, сондай-ақ саябақ аумағының санитарлық тазалығын сақтау кіреді.
Соңғы уақытта тұрғындар тарапынан саябақтағы тазалық пен күтіп-ұстау жұмыстарына қатысты бірқатар ұсыныстар мен сын-ескертпелер түскен болатын. Бүгінде көтерілген мәселелердің басым бөлігі шешімін тауып, саябақ аумағы ретке келтірілді.
Жұмыс кездесуі барысында жауапты тараптарға анықталған кемшіліктерді қысқа мерзімде толық жою, абаттандыру және күтіп-ұстау жұмыстарын тұрақты әрі сапалы жүргізу жөнінде нақты тапсырмалар берілді.
Алдағы уақытта Орталық саябақтың санитарлық тазалығы мен абаттандыру жұмыстары тұрақты бақылауда болады. Тұрғындарымыздың жайлы демалысы мен қауіпсіздігі – әрдайым басты назарда.
Ақпарат көзі : https://www.gov.kz/memleket/entities/zhambyl-zhualy/press/news/details/1268743?lang=ru
Жауап қалдыру Жауапты болдырмау