Ақмола облысында аграрлық колледждердің студенттері 2026 жылғы егін жинау науқанына белсенді қатысып, теориялық білімдерін нақты өндірістік жағдайда бекітуде. Өндірістік практика болашақ мамандарға заманауи ауыл шаруашылығы техникасымен жұмыс істеуді үйреніп, кәсіби дағдыларын дамытуға мүмкіндік береді.
Агробизнес және сервис колледжінде егін жинау жұмыстары жалғасуда. Бүгінде егіс алқаптарының 90%-ы жиналды. Науқанға Massey Ferguson, «Енисей-1200» комбайндары, Massey Ferguson және К-700 тракторлары жұмылдырылған. Жиналған астық элеваторға ГАЗ-53 автокөліктерімен тасымалданады.
«Егін жинау жұмыстарына «Ауыл шаруашылығын механикаландыру» мамандығының студенттері қатысуда. Олар заманауи техникамен жұмыс істеу барысында практикалық дағдыларын жетілдіріп, болашақ кәсібіне қажетті тәжірибе жинақтауда»,- деп айтты колледж директоры Валентина Путинцева.
Жоғары аграрлық-технологиялық колледжде технологиялық және өндірістік практика аясында 60 студент егін жинау науқанына қатысуда. Оның ішінде 40 білім алушы «Ауыл шаруашылығын механикаландыру», 20 студент «Агрономия» мамандығы бойынша білім алуда.
Колледж директоры Шоқан Оразалиннің мәліметінше, болашақ механизаторлар ауыл шаруашылығы техникасын дайындау және оған қызмет көрсету, астық жинайтын агрегаттарда жұмыс істеу, сондай-ақ өнімді тасымалдау үдерістеріне қатысуда. Ал агроном-студенттер егін жинау жұмыстарын ұйымдастыруға және бақылауға көмектесіп, өнім сапасын бағалауда.
Егін жинау науқанына қатысу студенттер үшін тек өндірістік міндеттерді орындау емес, сонымен қатар кәсіби шеберлікті шыңдайтын маңызды тәжірибе. Болашақ мамандар өндірістік үдерістерді ұйымдастырумен танысып, заманауи технологияларды меңгеруде және еңбек нарығында сұранысқа ие құзыреттерін қалыптастыруда.
Атап айтсақ, Ақмола облысында 27 колледж жұмыс істейді. Оның 10-ы аграрлық салаға мамандар даярлайды. Бұл оқу орындарында ауыл шаруашылығы бағытындағы мамандықтар бойынша 1 500-ден астам студент білім алуда. Олардың қатарында ауыл шаруашылығын механикаландыру, агрономия, ветеринария, зоотехния, мехатроника, орман шаруашылығы және ауыл шаруашылығы өнімдерін қайта өңдеу мамандықтары бар.
Ақпарат көзі : https://www.gov.kz/memleket/entities/aqmola-edu/press/news/details/1296523?lang=ru
Жауап қалдыру Жауапты болдырмау