Тәттімбет атындағы Қазақ академиялық халық аспаптар оркестрі мен Е. Рахмадиев атындағы Қарағанды академиялық симфониялық оркестрі шығармашылық маусымдардың жабылуына орай концерттерге шақырады.
Қазақ академиялық халық аспаптар оркестрі үшін 37-ші маусым аяқталуға жақын. Музыканттар соңғы концертін 22 мамыр сағат 18:30-да Станиславский театрының сахнасында береді.
Көрермендер үшін тенор Әлихан Зейнолла (Астана) мен сопрано Рысты Рахымжан (Қарағанды) өнер көрсетеді.
Дирижерлар Әбуәлісін Шоқанбаев, Ерлан Бақтыгерей, Әбілқайыр Сағымбаев және Мейрамгүл Кәріпжанова.
Рахмадиев атындағы Қарағанды академиялық симфониялық оркестрі 42-ші шығармашылық маусымын аяқтайды. Қорытынды концерт 17 мамыр сағат 17:00-де AMANAT партиясының концерт залында өтеді, Мекен-жайы: Әлиханов көшесі, 4.
Бағдарламаға Петр Ильич Чайковский мен Макс Брухтың шығармалары кіреді. Бас дирижері – Айдар Торыбаев. Скрипка мен альтта партияларды астаналық Ақбике Алғи мен Дияр Қасенов орындайды.
– Екі оркестр үшін де бұл маусым жемісті болды. Қазір «Шалқыма» концерт залына жөндеу жұмыстары жүргізіліп жатқанына қарамастан, біз концерттер бойынша жоспарымызды орындадық. Қарағандылықтар біздің оркестрлерді жақсы көреді, – дейді Қарағанды филармониясының бас директоры Талғат Ыдырысов.
Маусым аяқталғаннан кейін симфониялық оркестрдің музыканттары Қытайға сапарға дайындала бастайды. Сиань қаласында қарағандылықтар төрт концерт береді. Өнер кеші Қытайдағы Қазақстан жылына орайластырылады.
Ақпарат көзі : https://www.gov.kz/memleket/entities/karaganda/press/news/details/995764?lang=kk
Жауап қалдыру