Құтырудың алдын алу

Бұл табиғи ошақтық вирус жұқпасы адам мен жануарлардың орталық жүйке жүйесін зақымдайды және жұқтырған жануар тістеп алған немесе жеңіл тырнаған кезде сілекей арқылы беріледі.

Жұқпаның көзі ретінде жабайы жануарлар — қасқыр, түлкі, шибөрі, борсық, скунс, жарғанат, кеміргіштер, сондай-ақ үй жануарлары — иттер мен мысықтар бола алады. Әсіресе, екпе тарихын анықтау мүмкін емес қаңғыбас жануарлармен байланыс аса қауіпті.

Құтыру вирусын жұқтыру қаупі жоғары мамандық иелері:

зертханаларда, ғылыми және ветеринариялық мекемелерде сынама алып, зерттеу жүргізетін қызметкерлер;

қаңғыбас жануарларды аулау және ұстау қызметінің қызметкерлері;

орманшылар, аңшылар, қорықшылар;

таксидермистер, мал сою бекеттерінің қызметкерлері, кинологтар және үй жануарларының иелері.

Құтырудың алдын алудың негізгі әдісі — вакцинация. Екпе тек қауіп тобына кіретін адамдарға ғана емес, сонымен қатар үй жануарларына, жабайы және қаңғыбас жануарларға да жүргізіледі. Жануар тістеп алған немесе тырнап кеткен жағдайда карантин шаралары қолданылып, зардап шеккен адам шұғыл түрде медициналық көмекке жүгінуі керек.

Дәрігер антирабиялық вакцинамен емдік-профилактикалық иммундау курсын тағайындайды. Бұл – өмірлік маңызды шара: вакцинаны уақытылы енгізу ғана өлімге соқтыратын вирустың алдын алады.

Жануар тістеп алған немесе тырнаған жағдайда жараны көп мөлшердегі ағынды сумен сабынмен немесе басқа жуғыш затпен жақсылап жуу қажет, содан кейін 40–70% спиртпен немесе йод ерітіндісімен өңдеу керек.

Айта кетейік, жыл сайын 28 қыркүйекте Дүниежүзілік құтыруға қарсы күрес күні атап өтіледі. Бұл күн – алдын алу мен уақытылы вакцинацияның маңыздылығы туралы тағы бір мәрте ойлануға себеп.

Өзіңізді және үй жануарларыңызды қорғаңыз — вирусқа бірде-бір мүмкіндік бермеңіз.