2025 жылғы 23 мамырда Қазақстан Республикасының Экология және табиғи ресурстар министрі Ерлан Нысанбаев Қазақстандық Шетелдік инвесторлар кеңесі қауымдастығының (ҚШИКҚ) өкілдерімен жұмыс кездесуін өткізді. Кездесу Қазақстан Республикасы Президенті жанындағы Шетелдік инвесторлар кеңесінің 37-пленарлық отырысына дайындық аясында өтті және климаттық саясат пен көміртекті реттеу мәселелерін талқылауға арналды.
Кездесудің басты тақырыптарының бірі — 2026–2030 жылдарға арналған жаңа Ұлттық көміртек квоталары жоспары жобасын талқылау болды. Министр Ерлан Нысанбаев Қазақстанның Ұлттық деңгейде айқындалатын үлестерінде (ҰДАҮ) көрсетілген мақсаттарға жету үшін парниктік газдар шығарындыларын азайту қарқынын 3,41%-ға дейін арттыру қажет екенін атап өтті. Бұл – батыл, бірақ қажетті өзгеріс, ол экономиканың орнықты дамуына және халықаралық климаттық міндеттемелерді орындауға бағытталған.
Кездесу барысында Ерлан Нысанбаев өнеркәсіптік сектор өкілдерін метан шығарындыларын реттеу тетіктерін әзірлеуге белсенді қатысуға шақырды. Ол бұл шығарындыларды азайту жобаларына инвестициялар тартудың, соның ішінде халықаралық климаттық қорлар мен даму банктері арқылы маңызды екенін атап өтті.
Өз кезегінде ҚШИКҚ атынан сөйлеген ExxonMobil компаниясының Қазақстандағы басқарушы директоры Сессиль Ролин Қауымдастық мүшелерінің орнықты даму қағидаттарына және көміртектік бейтараптыққа қол жеткізуге берік бейілділігін растады және Қазақстан Республикасының Үкіметімен одан әрі ынтымақтастыққа дайын екенін білдірді.
Бұл кездесу мемлекет пен халықаралық бизнес арасындағы орнықты даму контексіндегі диалогты нығайтуда және ҚР Президенті жанындағы Шетелдік инвесторлар кеңесінің алдағы Пленарлық отырысына дайындықта маңызды қадам болды.
Ақпарат көзі : https://www.gov.kz/memleket/entities/ecogeo/press/news/details/1003383?lang=kk
Жауап қалдыру