Денсаулық сақтау министрлігі мектепте тамақтанудың жаңа стандартын енгізуге дайындығын талқылады

«Тамақтану стандартына сәйкес тамақтануды ұйымдастыру процесіне қатысушылардың барлығының нақты функциялары анықталды. Санитариялық-эпидемиологиялық бақылау комитеті үлгілік мәзірдің 3 нұсқасын әзірлеп, оларды өңірлік денсаулық сақтау басқармаларына жіберді. Жергілікті жерлерде ата-аналардан, балалардан және педагогикалық қоғамдастықтан негізделген тілектер болған жағдайда ұсынылған түрдегі немесе өзгерістер енгізе отырып перспективалық мәзір бекітілуі мүмкін», – деп атап өтті Денсаулық сақтау бірінші вице-министрі Тимур Сұлтанғазиев. 

Жаңа стандарт семіздік, қант диабеті, жүрек-қан тамырлары және басқа да созылмалы аурулардың даму қаупін азайту мақсатында қант пен тұзды тұтынуды азайтуды қоса алғанда, оқушылардың диетасын жақсартуға бағытталған. 

Дұрыс тамақтану саласындағы сарапшылардың бағалауы бойынша стандарт талаптарын қатаң сақтау балалардың семіздігін 10-15%-ға, 2 типті қант диабетін 10-20%-ға, артериялық гипертензияны 8-18%-ға және басқа созылмалы ауруларды 5-15%-ға төмендетуге ықпал етеді. Бұл ретте балалардың жаңартылған рационында көкөністі, жемісті, тұтас дәнді дақылдарды, ақуыздарды және сүт өнімдерін көбірек қосу көзделеді.

Қазіргі уақытта Қазақ тамақтану академиясының, Ұлттық салауатты тамақтану орталығының, ЮНИСЕФ-тің, ұлттық қоғамдық денсаулық сақтау орталығының және Санэпидбақылау комитетінің Ұлттық сараптама орталығының мамандарын тарта отырып, оқыту іс-шаралары белсенді жүргізілуде.