Көкшетау қаласында патрульдік полиция батальонының қызметкерлері мүмкін болған қайғылы жағдайдың алдын алды — өз-өзіне қол жұмсамақ болған ер адамды полиция қызметкерлерінің жедел әрі үйлесімді әрекеттерінің арқасында аман алып қалу мүмкін болды.
Оқиға тамыз айында орын алған. Шамамен сағат 13:40-та «102» жедел желісіне бойжеткен хабарласып, бауыры Volkswagen Polo маркалы көлігімен Автокөлік қалашығы ауданынан шығып кеткенін және оның өмірімен қоштасқысы келетінін айтқан. Ер адам орман алқабына қарай бет алған, бірақ нақты орналасқан жері белгісіз болған.
Шақыруға Көкшетау қаласы ПД патрульдік полиция батальонының аға инспекторы, полицияның аға лейтенанты Азамат Алиханович Албаков пен полиция капитаны Ербол Ескенович Турсумбаев дереу әрекет етті.
«Біз Карасай айналма жолының бойындағы орман жолағын тексеруді шештік, автодромның қарсы бетінде орналасқан. Ол жерде орманға қарай апаратын екі топырақ жол бар еді — бірін кездейсоқ таңдадық. Интуиция алдамады: орман ішінен тоқтап тұрған Volkswagen Polo көлігін таптық. Ішінде жас жігіт отыр екен», — деді аға лейтенант Албаков.
Полиция қызметкерлері ер адаммен жедел байланыс орнатып, психологиялық қолдау көрсете отырып, онымен сөйлесе бастады. Кәсіби және сауатты әрекеттерінің арқасында олар оны суицидтен бас тартуға көндіре алды.
Әңгімеден кейін ер адам №1 тірек полиция пунктіне жеткізілді. Біраз уақыттан соң сол жерге оның қарындасы да келіп, бауырын аман-сау күйінде қабылдап алды.
Кейінірек ер адамның мұндай күйге түсуіне жұбайымен болған отбасылық жанжал себеп болғаны анықталды.
«Біз ол үшін қатты алаңдадық. Ең бастысы — ол тірі қалды. Мұндай сәттерде жанында болып, тыңдап, қолдау көрсету өте маңызды», — деді полиция капитаны Ербол Турсумбаев.
Патрульдік полиция қызметкерлерінің кәсібилігінің, түйсігі мен жедел әрекетінің арқасында қайғылы жағдайдың алды алынып, адам өмірі сақталып қалды.
Ақпарат көзі : https://www.gov.kz/memleket/entities/mvd-akmola/press/news/details/1048218?lang=kk
Жауап қалдыру