2025 жылдың 29 тамыз күні еліміздің басты мерекелерінің бірі – Қазақстан Республикасының Конституциясы күніне орай Атырау облысы ТЖД ұйымдастыруымен «Жастар» мәдениет үйінде салтанатты іс-шара өтті. Мерекеге Департаменттің басшы құрамы, ардагерлер мен жеке құрам қатысты.
Іс-шара Департамент бастығы, полковник Н. Жаңабаевтың құттықтау сөзімен ашылды. Ол өз сөзінде төтенше жағдайлар саласында қызмет етіп жүрген мамандардың кәсіби шеберлігі мен еңбегін ерекше атап өтіп, барша әріптестерін атаулы мерекемен құттықтады.
Салтанатты жиын барысында ТЖМ Құрмет грамоталары мен Алғыс хаттары табысталып, сондай-ақ бірқатар қызметкерлер Атырау облысы және Атырау қаласы әкімдерінің Алғыс хаттарымен марапатталды. Сонымен қатар, Департамент бастығының атынан арнайы шақырылған қонақтарға да Алғыс хаттар беріліп, олардың салаға қосқан үлесі жоғары бағаланды.
Мереке соңында қала өнерпаздары көрерменге көтеріңкі көңіл-күй сыйлап, мерекелік концерт ұсынды.
Конституция күні құтты болсын! Еліміз аман, жұртымыз тыныш болғай!
Ақпарат көзі : https://www.gov.kz/memleket/entities/emer-atyrau/press/news/details/1059269?lang=kk
Жауап қалдыру