Төтенше жағдайлар министрлігінің бөлімшелері 404 жануарды құтқарды. Көмек үй жануарларына да, жабайы жануарларға да көрсетілді. Олардың қатарында жыландар, тауықтар, қабандар, шошқалар, ақбөкендер, көгершіндер, қойлар, сиырлар, иттер, мысықтар, қарғалар, жанаттар, түлкілер, жарқанаттар, түйелер, жылқылар, үйректер, аққулар мен бұғылар бар.
Құтқарылған жануарлардың ең көп бөлігін мысықтар — 94, жылқылар — 80 және иттер — 77 құрады. Жануарларды құтқару деректері еліміздің барлық өңірлерінде тіркелді, бұл құтқару бөлімшелері қызметінің ауқымы мен әлеуметтік маңыздылығын айқын көрсетеді.
2025 жылғы ең күрделі әрі есте қалған құтқару операциялары
Мұзбен үш сағаттық арпалыс: жылқыны құтқару (Ақтөбе қ.)
26 ақпанда Илек өзенінде куәгерлер мұз астына түсіп кеткен жылқыны байқаған — судың бетінде тек басы ғана көрініп тұрған. Көлікпен жету мүмкін болмағандықтан, құтқарушылар айтарлықтай қашықтықты жаяу жүріп өтті. Олар мұзды жарып, жағалауға дейін жол салу жөнінде күрделі шешім қабылдады. Үш сағатқа созылған тынымсыз жұмыстың нәтижесінде жануар құтқарылып, жақын маңдағы шаруашылықтың жылы қорасына орналастырылды.
Астанада битумға батып кеткен ит құтқарылды
10 маусымда елорданың Байқоңыр ауданында ит битумға батып қалды. Иесінің шақыруымен келген құтқарушылар қолда бар құралдардың көмегімен жануарды босатып, иесіне табыстады.
Қостанай облысында 9 метр тереңдіктен күшік құтқарылды
13 шілдеде түнгі уақытта Алтын-Дала ауылында жануар құдыққа құлап кеткен. Оқиға орнына шыққан құтқарушылар алдымен мысық болуы мүмкін деп болжаған. Альпинистік жабдық пен тыныс алу аппаратын пайдалана отырып, құтқарушы 9 метр тереңдікке түсіп, қорыққанымен дін аман күшікті жер бетіне алып шықты.
Қарағандыда жаңа туған марғауды құтқару оқиғасы
22 қыркүйекте құтқарушылар жеке тұрғын үйдің шатырынан әлі көзін ашпаған жаңа туған марғауды тапты. Үй иесінің байқампаздығы мен ТЖМ қызметкерлерінің жедел әрекеттерінің арқасында кішкентай тіршілік иесі аман қалып, оған қамқор болуға уәде берген әйелге табысталды.
Қарағандыда өрт кезінде адамдар мен үй жануары құтқарылды
24 желтоқсанда көпқабатты тұрғын үйдің жертөлесінде шыққан өрт кезінде құтқарушылар 9 тұрғынды эвакуациялап, бір адамды құтқару қалпағын қолдану арқылы алып шықты. Сонымен қатар, түтінге толы жертөледен ес-түссіз жатқан ит табылды. Жануарға тыныс алу аппаратының көмегімен алғашқы көмек көрсетіліп, иесіне тапсырылды.
Жануарларды құтқару Төтенше жағдайлар министрлігінің жалпы авариялық-құтқару қызметі аясында жүзеге асырылады. Адамдармен қатар, жануарлар да төтенше жағдайлар кезінде көмекті қажет ететін маңызды нысан болып қала береді.
Ақпарат көзі : https://www.gov.kz/memleket/entities/emer/press/news/details/1152185?lang=kk
Жауап қалдыру