Қаржы нарығын реттеу және дамыту агенттігі Бағалы қағаздар нарығы қадағалау саясатының 2026 жылға арналған негізгі басымдықтарын жариялады. Құжат қадағалау процесінің тиімділігін арттыруға және реттеуші әрекеттердің ашықтығы мен болжамдылығын қамтамасыз етуге бағытталған.
Мемлекет басшысының 2026 жылғы 10 ақпанда Үкіметтің кеңейтілген отырысында айтылған тапсырмасын орындау үшін Агенттік Ұлттық Банкпен бірлесіп Қор нарығын дамытудың 2030 жылға дейінгі бағдарламасын әзірлейтін болады. Бағалы қағаздар нарығын дамыту шеңберінде реттеуді жаңғыртуға, заманауи қаржы құралдарын енгізуге және ұлттық капитал нарығының бәсекеге қабілеттілігін арттыруға бағытталған Бағалы қағаздар нарығы туралы жаңа заңды әзірлеу бойынша ауқымды жұмыс жүргізілетін болады.
Қор нарығын дамыту бағдарламасын әзірлеу Қазақстанның екі қаржы орталығының синергиясын қамтамасыз етуді және ортақ қор нарығының бәсекелестік артықшылықтарын күшейтуді, цифрлық қаржы активтері нарығын дамыту үшін ынталандырушы реттеуді құруды және исламдық қаржыландыруды пайдалану әлеуетін кеңейту үшін исламдық қаржы құралдарын реттеуді жетілдіруді қоса алғанда, қор нарығын кешенді реформалауды көздейді.
Бағдарламада қорға жеке сектор субъектілерінің нарығына шығу үшін жағдайлар жасау, сондай-ақ шағын және орта капиталдандыру компанияларының IPO-сын жүргізу, Орталық Азия, Кавказ және Моңғолияның қаржы орталығы ретінде қор нарығын дамыту үшін инфрақұрылымдық ұйымдарды цифрлық трансформациялау, сондай-ақ жеке басқарушылардың инвестициялық мүмкіндіктерін кеңейту бөлігінде зейнетақы активтерін басқару реформасы көзделген.
Бағалы қағаздар нарығы туралы заң жобасын әзірлеу шеңберінде эмитенттердің қор нарығына шығуын реттеуді ырықтандыру және корпоративтік басқару сапасын арттыру, ақпаратты ашуға және капиталды тартуға қойылатын оңайлатылған талаптары бар жаңа ұйымдық-құқықтық нысанды енгізу, әлемдік практикаларды ескере отырып, исламдық қаржы құралдарының шығарылымы мен айналысын регламенттеу және цифрлық қаржы активтерінің айналысын реттеу сияқты негізгі бағыттар көзделетін болады.
Тәуекелге бағдарланған қадағалау жүйесін дамыту көзделіп отыр –биыл Агенттік пруденциялық талаптарды күшейту, алгоритмдік сауда мен сауда платформаларының қызметіне бақылауды арттыру, сондай-ақ лицензиясы жоқ адамдардың заңсыз қызметінің жолын кесу жөніндегі шаралар кешенін іске асырады.
Қадағалап бағалаудың жаңа моделінің ауқымын кеңейту де негізгі бағыт болады. Қадағалап бағалауды жүргізу бойынша ішкі нұсқауды әзірлеу және бекіту жоспарлануда.
Құжаттың толық мәтіні Агенттіктің сайтында қолжетімді.
Сыртқы коммуникациялар басқармасы
Ақпарат көзі : https://www.gov.kz/memleket/entities/ardfm/press/news/details/1174260?lang=kk
Жауап қалдыру