Абай облысының барлық білім беру ұйымдарында «Қылмыссыз ортаны құру – қоғам міндеті» тақырыбында жалпы диктант өткізілді. Оған 30 мыңнан астам жоғары сынып оқушылары мен колледждердің 1-курс студенттері қатысты.
Іс-шара құқықтық мәдениетті қалыптастыруға, азаматтық жауапкершілікті арттыруға және құқықбұзушылықтың кез келген көріністеріне төзбеушілік қағидатын орнықтыруға бағытталған «Заң және тәртіп» идеологемасын жүзеге асыру мақсатында ұйымдастырылды.
Диктанттың негізгі мақсаты – білім алушылардың құқықтық сауаттылық деңгейін арттыру және заңға құрметпен қарау мәдениетін қалыптастыру. Іс-шара барысында қатысушылар құқықтық нормаларды сақтаудың, адалдық, әділдік және өзара құрмет қағидаттарының маңыздылығын түсінетіндерін көрсетті.
– Абай облысының барлық мектептерінде өткен бұл диктант оқушылардың құқықтық сауаттылығын арттыруға ықпал етті. Қоғамдағы тәртіп пен тұрақтылықтың негізі – заңды білу және оны сақтау. Осындай шаралар арқылы мектеп оқушыларының құқықтық санасын қалыптастыруға ерекше мән беріледі, – деді №31 мектептің тәрбие ісі жөніндегі директордың орынбасары Раушан Ахметжанова.
Диктант қорытындысы бойынша қатысушылар өздерінің сауаттылық деңгейін тексеріп қана қоймай, құқықтық тәртіптің тұрақты әрі өркендеген қоғамның негізі екенін тереңірек түсінуге мүмкіндік алды.
Ақпарат көзі : https://www.gov.kz/memleket/entities/abay-ishki-sayasat/press/news/details/1177144?lang=kk
Жауап қалдыру