14 наурыз күні шамамен сағат 17:30-да Ақтау қаласында 34А және 35 шағын аудандарының арасындағы жолда кішкентай бала жалғыз өзі жолдың жүріс бөлігіне жүгіріп шыққан.
Баланы алғаш болып өтіп бара жатқан жүргізуші байқап, көлігін тоқтатып, оны қауіпсіз жерге — жол жиегіне алып шыққан.
Осы уақытта жақын маңда Амал мерекесіне байланысты Отпан тау маңында кезекшілік атқарып жүрген патрульдік полиция қызметкерлері болған. Патрульдік полиция ротасы командирінің орынбасары, полиция капитаны Тилеккабыл Жанбиев және аға инспектор, полиция капитаны Нурсултан Измуратов баланы қызметтік автокөлікке отырғызып, жағдай туралы жедел басқару орталығына хабарлаған.
Көп ұзамай баланың ата-анасы ұлын жоғалтып алғанын айтып, «102» қызметіне хабарласқаны белгілі болды. Бала аман-есен ата-анасына жеткізілді.
Полиция қызметкерлері ата-аналарды кішкентай балаларды қараусыз қалдырмауға және олардың қауіпсіздігіне ерекше көңіл бөлуге шақырады.
Ақпарат көзі : https://www.gov.kz/memleket/entities/mvd-mangystau/press/news/details/1181393?lang=kk
Жауап қалдыру