«Атамекен» Ұлттық кәсіпкерлер палатасы Төралқа Төрағасы Қанат Шарлапаевтың Солтүстік Қазақстан облысына жұмыс сапары елдің негізгі аграрлық-индустриялық өңірінің экономикалық әлеуетін іс жүзінде бағалауға және кәсіпкерлер қоғамдастығымен бизнес, инвестициялық орта және кәсіпкерлікті қолдау институттарын дамытуға қатысты жаңа тәсілдерді талқылауға мүмкіндік берді.
Солтүстік Қазақстан облысының аумағы – шамамен 98 мың шаршы шақырым. Мұнда жарты миллионнан астам адам тұрады, ал экономикасы 35 мыңнан астам жұмыс істеп тұрған шағын және орта бизнес субъектілеріне сүйенеді. Соңғы жылдары облыс айтарлықтай өсім динамикасын көрсетіп келеді. Жалпы өңірлік өнім көлемі 2,6 трлн теңгеден асты, ал өсім қарқыны 18 пайызға жетті. Экономикалық белсенділікке ауыл шаруашылығы үлкен үлес қосуда, оның көлемі 1 трлн теңгеден асты, ал өнеркәсіп одан да жоғары өсім қарқынын көрсетуде.
Солтүстік Қазақстан облысы дәстүрлі түрде Қазақстан мен Ресей арасындағы маңызды көлік дәлізі болып қалуда және Солтүстік-Оңтүстік пен Батыс-Шығыс бағыттары бойынша жүк транзитінде маңызды рөл атқарады. Бұл ретте аймақ біртіндеп әртараптандырылған экономикалық модель қалыптастырып келеді, мұнда аграрлық сектордан бөлек өнеркәсіп, өңдеу және экспортқа бағытталған өндірістер қарқынды дамуда. Дәл осы бағыттар Қанат Шарлапаевтың өңір кәсіпкерлерімен және Кәсіпкерлер палатасының Өңірлік кеңес мүшелерімен кездесулерінің негізгі тақырыбына айналды.
Сапардың негізгі бөлігі Кәсіпкерлер палатасының Өңірлік кеңес мүшелерімен кездесу болды. Диалог кеңес төрағасы Сергей Домаевтың және өңірлік палата директоры Есжан Оразалин бастаған ұжымның қатысуымен өтті.
Қанат Шарлапаев өз сөзінде кәсіпкерлер өңір экономикасының тірегі екенін әрі жұмыс орындарын құрып, жергілікті қауымдастықтардың тұрақтылығын қамтамасыз ететін маңызды әлеуметтік күш болып отырғанын атап өтті. Ол қазіргі іскерлік ортаның дамуы мемлекет пен бизнес арасындағы өзара іс-қимылдың жаңа сапасын талап ететінін, ал бұл өзара іс-қимыл бүгінде тұрақты диалог пен мемлекеттік бастамаларды алдын ала талқылауға негізделген жүйелі модельге көшіп жатқанын айтты.
Кәсіпкерлер палатасының жұмысын жаңғырту мәселесіне ерекше назар аударылды. «Атамекен» басшысының айтуынша, бүгінде жүйе алдында бизнесті қорғау тәсілдерін жаңарту, талдамалық құрамды күшейту және шешім қабылдауда нақты экономикалық база мен кәсіпкерлердің сұранысына сүйену міндеті тұр. Негізгі бағыттардың бірі – инвестицияларды қолдаудың жаңа құралдарын қалыптастыру. Бұл қолданыстағы кәсіпорындар негізінде инвестициялық жобалар пулын құру және бизнес, мемлекет пен даму институттары арасындағы үшжақты өзара іс-қимылды қалыптастыруды көздейді. Сондай-ақ, инвесторларды қорғауда прокуратура органдарының белсенді қатысуы инвестициялық ортаға деген сенімді арттыруға ықпал етеді.
Солтүстік Қазақстан облысы прокурорының орынбасары Тыныбек Сапаровтың айтуынша, «2025 жылдың қорытындысы бойынша прокуратура органдары кәсіпкерлердің 60-тан астам проблемалық мәселесін қарап, 800-ден астам бизнес субъектісінің құқығын қорғап, 261,3 млн теңге көлемінде олардың мүддесін қалпына келтірді. Бұл әкімшілік кедергілерді азайту және мемлекет пен бизнес арасындағы сенімді нығайту бойынша жүйелі жұмыстың тиімділігін көрсетеді».
Кәсіпкерлік секторға қатысты реформалар тақырыбы да талқылауда маңызды орын алды. Ұлттық палата Тауарлардың ұлттық каталогын енгізу, отандық өндірушілер тізілімін қалыптастыру және жаңа салық заңнамасын тәжірибеде қолдану сияқты жүйелі өзгерістерді сүйемелдеуде. Бұл құралдар нарықтың ашықтығын арттырып, отандық өндірісті дамыту үшін қолайлы жағдай жасауға бағытталған.
Диалог өңір кәсіпкерлерімен кеңейтілген кездесуде жалғасты. Мұнда Солтүстік Қазақстан облысының ел экономикасындағы стратегиялық рөлі талқыланды. Өңір дәстүрлі түрде Қазақстанның негізгі астықты аймақтарының бірі әрі азық-түлік қауіпсіздігінің маңызды элементі болып саналады. Сонымен қатар, мұнда ауыл шаруашылығы өнімдерін терең өңдеу, машина жасау құзыреттері және шекара маңы саудасының логистикалық мүмкіндіктерін қамтитын заманауи агроөнеркәсіптік кластер қалыптасуда.
Облыс әкімінің орынбасары Қанат Дүзелбаев өңір экономикасындағы кәсіпкерліктің рөлін атап өтті:
«Бүгінде облыста 35 мыңнан астам шағын және орта бизнес субъектісі жұмыс істейді, онда 108,3 мың адам жұмыспен қамтылған, ал ШОБ-тың өңір экономикасындағы үлесі 29%-ға жетті. Мемлекет басшысының тапсырмасы бойынша биыл кәсіпкерлікті қолдауға 18 млрд теңгеден астам қаражат бағытталды», – деді ол.
Кездесу барысында ҰКП Төралқа Төрағасы инвестициялар экономикалық өсім мен жаңғыртудың басты драйвері екенін, ал инвесторлар үшін негізгі фактор – сенім мен қауіпсіз, болжамды іскерлік ортаның болуы екенін атап өтті.
Бағдарламаның жарқын сәттерінің бірі «Бір ауыл – бір өнім» жобасы финалистерінің көрмесі болды. Мұнда ондаған жергілікті брендтер мен шағын өндірістер ұсынылды. Кәсіпкерлер ет өнімдерін өңдеу, крафт ірімшіктер, ара шаруашылығы өнімдері, нан-тоқаш өнімдері, қолөнер бұйымдары, сувенирлер, аяқ киім және ағаш өнімдерін көрсетті. Бұл жоба ауылдық жерлерде жаңа экономикалық өсу нүктелерінің қалай қалыптасып жатқанын және жергілікті брендтердің кең нарыққа шығу мүмкіндігін айқын көрсетеді.
Сапардың тәжірибелік бөлігі өңірдің индустриялық әлеуетін көрсететін бірқатар кәсіпорынды аралауды қамтыды. Олардың қатарында 2021 жылы іске қосылған және трансформатор өндіруге маманданған Петропавл электротехникалық зауыты бар. Жылына 13 мың дана өнім шығаратын кәсіпорын – облыстағы осындай жабдықты өндіретін жалғыз өндіріс және негізінен ТМД елдерінің экспорттық нарықтарына бағытталған.
Өңірдің өнеркәсіптік аймағында ағаш өңдеу кластері де дамуда. «Qyzyljar» арнайы экономикалық аймағында орналасқан Nord Panels компаниясы ламинацияланған тақтайлар, ЛАТП және басқа да ағаш өңдеу өнімдерін шығарады, олардың басым бөлігі Еуропа нарығына экспортталады.
Аграрлық сектор заманауи жоғары технологиялық жобамен ұсынылған – ECO GLADE кәсіпорны. Ол саңырауқұлақтарды өнеркәсіптік өсіру және компост өндіруге маманданған. Бұл жоба – өңірдегі қосылған құны жоғары өнім өндіруге және өңдеу тізбектерін дамытуға бағытталған жаңа инвестициялық бастамалардың бірі.
Жұмыс сапары Солтүстік Қазақстан облысының аграрлық дәстүрлер мен өнеркәсіп, өңдеу және экспортқа бағытталған өндірістерді үйлестіретін теңгерімді экономикалық модель қалыптастырып келе жатқанын көрсетті.
Ұлттық кәсіпкерлер палатасы үшін бұл сапар өңірлік бизнеспен тікелей диалог орнатудың маңызды кезеңіне айналды және кәсіпкерлікті қолдаудың жаңа тетіктерін талқылауға, палата институтын жаңғыртуға және мемлекет пен бизнес арасындағы әріптестікті нығайтуға мүмкіндік берді. Осындай диалог бүгінде тұрақты экономикалық өсімнің және өңірлерде де, жалпы ел экономикасында да жаңа даму нүктелерінің қалыптасуының басты шартына айналып отыр.
Ақпарат көзі : https://www.gov.kz/memleket/entities/sko-kasipker/press/news/details/1183812?lang=kk
Жауап қалдыру