Мерекелік іс-шара Омбы қаласындағы Қазақстан Республикасының Бас консулдығы мен «Омбы қазақтары» өңірлік қоғамдық ұйымы тарапынан Омбы облысы Үкіметінің қолдауымен бірлесіп ұйымдастырылды.
Бұл күні Омбы қаласының тұрғындары мен қонақтары қазақ халқының бай дәстүрлері мен мәдениетімен танысып, көктемнің келуін және жаңа өмірлік кезеңнің басталуын бірге атап өту мүмкіндігіне ие болды.
Концерт залының фойесінде мерекелік бағдарлама ұйымдастырылды. Қонақтарға ұлттық сувенирлер мен сәндік-қолданбалы өнер бұйымдары ұсынылған шығыс базары, сондай-ақ дәстүрлі қолөнер бойынша шеберлік сабақтары ұсынылды. Кішкентай келушілер үшін «Ойнатека» интерактивті аймағы ұйымдастырылып, онда олар халықтық ойындар мен салт-дәстүрлермен танысты. Сонымен қатар, ұлттық киім үлгілерін киіп көруге мүмкіндік берілген мерекелік киіз үй мен фотозона келушілердің ерекше қызығушылығын тудырды.
Іс-шараға қатысушыларға Қазақстан Республикасының Омбы қаласындағы Бас консулы К.К. Кожамбердиев, Омбы облысы ішкі саясат министрінің орынбасары Р.С. Герасимчук, Ресей Федерациясы Сыртқы істер министрлігінің Омбы қаласындағы өкілі Е.В. Генова, сондай-ақ «Омбы қазақтары» өңірлік қоғамдық ұйымы төрағасының орынбасары Т.М. Ашенова құттықтау сөз сөйледі.
Мерекенің шарықтау шегі концерт залының басты сахнасында өткен «Қош келдің, Наурыз!» атты концерт болды. Концерттік бағдарламаға қатысқан шығармашылық ұжымдар мен орындаушылар ұлттық нақыш пен Қазақстанның мәдени мұрасын айшықтайтын жарқын музыкалық және хореографиялық қойылымдар ұсынды.
Іс-шара қонақтары мұндай іс-шараларды өткізу халықтар арасындағы достық пен өзара түсіністікті нығайтуға, мәдени-гуманитарлық ынтымақтастықты дамытуға және ұлттық дәстүрлерді сақтауға ықпал ететінін атап өтті.
Ақпарат көзі : https://www.gov.kz/memleket/entities/mfa-omsk/press/news/details/1186975?lang=kk
Жауап қалдыру