Өңірлік экологиялық саммит аясында Қазақстан Республикасы Экология және табиғи ресурстар министрі Е. Нысанбаевтың Дүниежүзілік метеорологиялық ұйымның (ДМҰ) Бас хатшысы Селеста Сауло ханыммен кездесуі өтуде.
Тараптар гидрометеорология, климаттық мониторинг және ерте ескерту жүйелерін дамыту саласындағы ынтымақтастықты талқылауда. Климаттық тәуекелдердің күшеюі жағдайында халық қауіпсіздігін, сондай-ақ су және азық-түлік қауіпсіздігін қамтамасыз етумен байланысты Қазақстанның ұлттық гидрометеорологиялық қызметін дамыту стратегиялық маңызға ие екені атап өтілуде.
Қазақстан ДМҰ-ның белсенді мүшесі ретінде «Баршаңызға алдын ала хабарлау» жаһандық бастамасын қолдайды және оны климаттық қауіптерге төзімділікті арттырудың маңызды элементі ретінде қарастырады. Осыған байланысты Қазақстан Өңірлік экологиялық саммит аясында Орталық Азиядағы ерте ескерту жүйелеріне арналған тақырыптық сессия өткізуді бастама етіп отыр.
GBON шеңберінде гидрометеорологиялық деректермен еркін алмасу қағидаттарына Қазақстанның бейілділігі және ұлттық жүйелерді WIGOS архитектурасына біріктіру бойынша жұмысты жалғастыруы атап өтілуде.
Тараптар Қазақстанның ұлттық гидрометеорологиялық қызметін нығайту шараларын, соның ішінде қаржыландыруды ұлғайту, қызметкерлердің жалақысын көтеру және инфрақұрылымды жаңғыртуды талқылауда.
Сондай-ақ ДМҰ-мен ынтымақтастықты дамытуға ерекше назар аударылуда, оның ішінде бұлтқа әсер ету (жасанды жауын-шашын туғызу) технологияларын қолдану жөніндегі келісімдерді іске асыру, ғылыми алмасуды кеңейту және азық-түлік пен экологиялық қауіпсіздікті нығайту.
Гидрометеорологиялық болжауда жасанды интеллект технологияларын енгізу перспективалары, сондай-ақ донорлық қаржыландыруды тарту және деректерді болжау мен талдау жүйелерін қоса алғанда, заманауи цифрлық шешімдерді пайдалану мүмкіндіктері қарастырылуда.
Сонымен қатар ДМҰ-ның қолдауымен халықаралық орталықтар базасында Қазақстан мамандарының біліктілігін арттыру бағдарламаларын кеңейту мәселесі талқылануда.
Тараптар Орталық Азиядағы құрғақшылық тәуекелдерін азайтуға және ерте ескерту жүйелерін дамытуға бағытталған Құрғақшылықпен кешенді күрес жөніндегі өңірлік жобаны ілгерілетудің маңыздылығын атап өтуде.
Қазақстан ДМҰ-ға ерте ескерту жүйелері мен апаттық тәуекелдерді азайту саласын дамытуға донорлық қолдауды тартуға көрсеткен жәрдемі үшін алғыс білдіреді.
Тараптар гидрометеорология және климаттық тұрақтылық саласындағы халықаралық бастамаларды одан әрі тереңдетуге және ынтымақтастықты дамытуға өзара қызығушылық бар екенін растайды.
Ақпарат көзі : https://www.gov.kz/memleket/entities/ecogeo/press/news/details/1207888?lang=kk
Жауап қалдыру