РЭС 2026 алаңында Қазақстан Республикасының Экология және табиғи ресурстар министрі мен тұрақты даму жөніндегі халықаралық сарапшы, Корея Республикасының Жаһандық бейімделу орталығының кеңесшісі дәрігер Рэ Квон Чунг арасында кездесу өтті.
Ерлан Нысанбаев сұхбаттасушыға тұрақты даму және климаттық саясат саласындағы халықаралық ынтымақтастықты дамытуға қосқан елеулі үлесі үшін алғыс білдіріп, оның экономикалық дамуды қоршаған ортаға жауапкершілікпен қараумен тиімді ұштастыруға бағытталған «жасыл өсу» тәсілдерін ілгерілетудегі рөлін, сондай-ақ елдерге төмен көміртекті стратегияларды әзірлеу және климаттық қаржыландыруды тарту бойынша қолдау көрсетуге бағытталған халықаралық бастамаларға қатысуын атап өтті.
Корея Республикасы Қазақстан үшін тұрақты даму, төмен көміртекті технологияларды енгізу және заманауи климаттық күн тәртібін қалыптастыру мәселелерінде маңызды әрі сенімді серіктес болып қала береді. Қазақстан Париж келісімі шеңберіндегі міндеттемелерін дәйекті түрде жүзеге асыруда. Елде 2060 жылға дейін көміртегі бейтараптығына қол жеткізу стратегиясы бекітілген, ал жаңартылған ұлттық айқындалатын үлес (ОНАҮ 3.0) 2035 жылға қарай 1990 жыл деңгейімен салыстырғанда парниктік газдар шығарындыларын 17%-ға қысқартуды көздейді. Сонымен қатар, Қазақстан неғұрлым өршіл климаттық мақсаттарға қол жеткізу үшін халықаралық ынтымақтастықты кеңейтуге мүдделі.
Екіжақты өзара іс-қимылдың маңызды кезеңі ретінде Қазақстан мен Корея Республикасы арасында Париж келісімінің 6-бабы бойынша ынтымақтастық туралы меморандумға қол қойылуы атап өтіледі. Бұл құжат бірлескен климаттық жобаларды іске асыруға, инвестициялар тартуға және технологиялар алмасуға негіз ретінде қарастырылады. Оның аясында, атап айтқанда, Алматы облысындағы Қарасай қатты тұрмыстық қалдықтар полигонында полигон газынан электр энергиясын өндіру жобасы пысықталуда.
Көміртегі бірліктерін генерациялау жобаларын дамытуға және органикалық қалдықтарды қайта өңдеу саласындағы заманауи шешімдерді енгізуге ерекше назар аударылады. Қазақстан тұрақты даму, экологиялық тұтастық және ашықтық қағидаттарын сақтай отырып, мұндай бастамаларды белгіленген тәртіпте зерделеуге және іске асыруға дайын екенін растайды.
Ынтымақтастықтың перспективалы бағыты ретінде тағам қалдықтарын қайта өңдеу, биогаз технологияларын дамыту және циркулярлық экономика қағидаттарына сәйкес келетін өзге де ресурсты үнемдейтін шешімдер бойынша тәжірибе алмасу қарастырылады. Тағам қалдықтарын қайта өңдеу арқылы биомасса (biochar) алу жобасы қалдықтар көлемін едәуір қысқартуға және жоғары қосылған құны бар өнім өндіруге мүмкіндік беретін тиімді шешім ретінде бағаланады.
Органикалық қалдықтарды биомассаға айналдыру жобаларын дамыту қалдықтарды басқарудың тұрақты моделіне көшу мен климаттық мақсаттарға қол жеткізудің маңызды элементі ретінде қарастырылады.
Министрлік парниктік газдар шығарындыларын азайтуға, төмен көміртекті экономиканы дамытуға және екіжақты ынтымақтастықты нығайтуға бағытталған практикалық бастамаларды пысықтау мен іске асыруға жан-жақты қолдау көрсетуге дайын екенін растайды.
Ақпарат көзі : https://www.gov.kz/memleket/entities/ecogeo/press/news/details/1208051?lang=kk
Жауап қалдыру