КЕЛЕС: 170 ШАҚЫРЫМДЫҚ ЖАҢА ЖОЛ МЕН ЖАҢҒЫРҒАН НЫСАНДАР

Келес ауданында соңғы алты жылда «Ауыл – Ел бесігі» бағдарламасы аясында атқарылған жүйелі жұмыстар елді мекендердің инфрақұрылымын жаңғыртуға жаңа серпін беріп, ауыл келбетін түбегейлі өзгертті. 2019–2025 жылдар аралығында ауданды дамытуға 7,7 миллиард теңгеден астам бюджет қаражаты бағытталып, осы мерзім ішінде жол, табиғи газ, электр қуаты, білім беру және спорт салаларында стратегиялық маңызы бар жобалар іске асырылды. Бағдарламаның алғашқы кезеңінде Абай ауылындағы орталық стадион мен Ә.Кенжеев атындағы мәдениет үйі заманауи талаптарға сай жаңартылып, елді мекендердегі 23 көшеге орташа жөндеу жұмыстары жүргізілді.

Инфрақұрылымдық дамудың келесі кезеңдерінде білім беру нысандарына басымдық беріліп, Ошақты елді мекеніндегі №46 Абай атындағы орта мектептің 300 орындық қосымша оқу корпусы бой көтерді және Мақташы, Жамбыл, Жолбасшы ауылдарындағы мектептер күрделі жөндеуден өтіп, пайдалануға берілді. Сонымен қатар халықты коммуналдық игіліктермен қамтамасыз ету мақсатында Абай ауылының бірнеше мөлтек ауданына табиғи газ желілері тартылып, Бірлік, Құйған, Қияжол, Жаңатіршілік және Жуантөбе елді мекендерінің электр жүйелері толық жаңартылды. Мәдениет пен спорт саласында да айтарлықтай өсім байқалып, Қошқарата, Жамбыл және Жиделі ауылдарында жаңа мәдениет ошақтары ашылса, Абай ауылында ауқымды дене шынықтыру-сауықтыру кешенінің құрылысы аяқталды.

Өткен кезеңдегі жоспарлы жұмыстардың заңды жалғасы ретінде Жүзімдік ауылдық округіндегі жаңа мәдениет үйі мен қосымша инфрақұрылымдық нысандар ауданның әлеуметтік әлеуетін арттыра түсті. Келес ауданының экономика және қаржы бөлімінің басшысы Әбдікәрім Мұналовтың айтуынша, бағытталған қомақты инвестициялық қаржы тек статистикалық көрсеткіш емес, бұл ауыл тұрғындарының өмір сүру сапасын арттыруға және ауылдық аумақтарды тұрақты дамытуға жасалған нақты қадам болып табылады. Осылайша «Ауыл – Ел бесігі» бағдарламасы Келес өңірін түлетудің негізгі тетігіне айналып, жүйелі дамудың жаңа межелерін бағындыруда.