Астана қаласында тұрғындар мен қала қонақтарының қауіпсіздігін қамтамасыз ету мақсатында 40 “SOS” жедел шақыру батырмасы орнатылып, тәулік бойы үздіксіз жұмыс істеп тұр.
Аталған батырмалар адам көп шоғырланатын орындарда, атап айтқанда теміржол вокзалдары, базарлар мен қалалық саябақтар аумағында орналасқан. Бұл инфрақұрылым төтенше жағдай туындаған сәтте азаматтарға полициядан жедел әрі қолжетімді түрде көмек сұрауға мүмкіндік береді.
Жыл басынан бері “SOS” батырмалары арқылы полицияға 9 өтініш келіп түскен. Барлық хабарламалар бойынша тәртіп сақшылары жедел әрекет етіп, оқиға орындарына дер кезінде жетіп, тиісті тексеру жұмыстарын жүргізген.
Мәселен, кешкі уақытта Қабанбай батыр даңғылы бойындағы сауда-ойын-сауық орталықтарының маңында күдікті тұлғалардың жүргені туралы хабарлама тіркелген. Оқиға орнына жедел жеткен полиция қызметкерлері аумақты тексеріп, мән-жайды анықтау үшін қажетті шараларды қабылдады.
Полиция тұрғындарды сақтық шараларын сақтауға және күмәнді жағдайлар туындаған кезде “SOS” батырмасын немесе “102” арнасын пайдалануға шақырады.
Ақпарат көзі : https://www.gov.kz/memleket/entities/qriim/press/news/details/1210116?lang=kk
Жауап қалдыру